د. ابراهيم الفقي سلسلة الطريق الى النجاح_03

د. ابراهيم الفقي سلسلة الطريق الى النجاح_02

د. ابراهيم الفقي سلسلة الطريق الى النجاح_01

الحياة أمل - قوة التحكم في الذات.10

د. ابراهيم الفقي سلسلة قوة التحكم بالذات.02

الدكتور ابراهيم الفقي وقوة التحكم بالذات.01

مقالة احمد حلمى الاخير فى جريدة الدستور كان نفسى اطلع عربجي

أحمد حلمي يكتب: كان نفسي أطلع عربجي
الأربعاء, 2010-01-27 15:42

و العربجي ماله! وحش في إيه؟.. وبعدين هو لو وحش.. ليه ماما كانت بتسيبني أقعد جنبه وإحنا رايحين لجدتي

 هو العربجي ماله! وحش في إيه؟

يا تري عمرك اتمنيت تطلع عربجي..؟! أنا اتمنيت.. وكنت فاكر إن الورق المطلوب علشان الواحد يبقي عربجي.. ورقه تثبت إن الواحد بيعرف يسوق حصان.. أو حمار.. بس أنا كان طموحي إني أبقي باسوق حنطور مش كارو.. كنت معجب جدا بشكل الحنطور وخطوطه الانسيابية ولونه ودناديشه والكلاكس بتاعه اللي كان بيضربه العربجي برجله.. يا سلام علي شكل العربجي وهو متربع علي عرش الحنطور كده وماسك كرباجه في إيده ولا فتوات الحرافيش.. حبيت أوي الحنطور والعربجي.. لحد ما ابتديت أسمع جمل من ناس كان وجود لفظ العربجي فيها لا يدل علي إنه حاجة لطيفة.. زي مثلا: «بلاش شغل العربجية ده».. «إنت شكلك قليل الأدب وعربجي».. «ماتصاحبش الواد ده لحسن شكله كده عربجي».. «إنت إيه.. عربجي».. ولا جملة سمعتها علي العربجي كانت تبشر بالخير أو تشجع إني أطلعه.. ردود الناس خلتني أسأل نفسي كتير، هو العربجي وظيفة ولا شتيمة؟ ولو هي شتيمة زي يا كلب ويا حمار ويا صايع وكده.. يبقي الراجل اللي بيسوق الحنطور ده بيشتغل إيه؟! اسم شغلانته إيه؟! ولما إجابتي دايما كانت بتقول إنه «عربجي»، قلت أسأل حد غيري.. بس غيرت السؤال من، هو العربجي وظيفة ولا شتيمة؟ لـ هو العربجي ده حلو ولا وحش؟.. كلها كانت ردود وإجابات مش مقنعة بالمرة.. ناس قالولي طبعا مش حلو علشان طول النهار بيبقي قاعد في الشارع.. أمال يقعد فين؟! في جروبي.. واللي يقول وحش طبعا لأنه قليل الأدب وبيشتم.. طب وهو مين مابيشتمش.. ما كله بيشتم.. وبغض النظر عن الجملة التربوية اللي هاكتبها دلوقتي إن الشتيمة شيء سيئ وقبيح.. بس موجودة وبتحصل.. في سواقين ميكروباص بيشتموا وسواقين تاكسيات بيشتموا.. وميكانيكية وسباكين ونقاشين بيشتموا ودكاترة ومهندسين بيشتموا.. وأعضاء مجلس شعب بيشتموا.. ووزرا بيشتموا وأبهات وأمهات بيشتموا.. ولا الشتيمة بقي ليها ناس وناس.. ناس تشتم، فتبقي الشتيمة طالعه من بقهم زي العسل ودمهم خفيف أوي.. وناس تشتم تبقي شتيمهم وحشة وقولالات الأدب.. مش عارف أنا محير نفسي ليه! ما أسأل صاحب الشأن.. سألت عربجي وقلتله هو إنت بتشتغل إيه لو سمحت؟ قالي أنا خريج آداب بس حاليا عربجي.. قولتله هي العربجة بتاخد آداب.. قالي لا وتجارة وعلوم وحقوق وزراعة.. كله.. أي حد خريج أي كلية ممكن يشتغل عربجي عادي.. المهم يبقي عنده حصان.. أو حمار.. موضوع العربجي ده كان شاغل تفكيري من زمان أوي.. من صغري تقريبا.. لما كنت باركب الحنطور سواء كنت راكب أو متشعبط ورا.. لدرجة إنه لما كان حد من الضيوف بيسألني نفسك تطلع إيه؟.. كنت برد بمنتهي الطموح والسعادة، وأقولهم: نفسي أطلع عربجي.. وكان كل اللي حواليا يضحكوا.. وكانت أمي تبصلي بصة.. كانت كبيرة علي إني أفهمها.. بس كان معناها بيوصلني.. نظرتها كانت بتقول: «إيه اللي إنت بتقوله ده؟».. أنا مكنتش حاسس إني باقول حاجة عيب.. هو أنا مثلا قولت نفسي أطلع حمار.. أنا باقول عربجي.. ماكنتش عارف أمي بتبصلي كده ليه؟ وماكنتش فاهم الناس اللي حواليها ضحكوا ليه؟.. هو العربجي ماله! وحش في إيه؟.. وبعدين هو لو وحش.. ليه ماما كانت بتسيبني أقعد جنبه في الحنطور وإحنا رايحيين لجدتي يوم الخميس.. ولما كنا بنروح الهرم.. كنت باشوف الأجانب واقفين بيتصوروا جنب أبوالهول والأهرامات والعربجي.. يكونش الأجانب فاهمين قيمة العربجي وإحنا لأ!.. لأ مش جايز.. ده أكيد، لأني عمري ما شفت واحد مصري بيتصور جنب عربجي.. كنت هاموت وأعرف ماما زغرتلي ليه؟.. والناس ضحكوا ليه ؟.. هي المشكلة فينا ولا في العربجي؟.. حبيت ألعب اللعبة تاني مع ضيوف تانيين.. بس المرة دي قررت ميتزغرليش.. فغيرت الوظيفة.. وسألني ضيف من نوع الضيوف البايخين اللي وهو بيسألك يلعبلك في شعرك وينعكشهولك، وإنت بقالك ساعة بتسبسب فيه وبتلزقه بالفازلين.. وفي الغالب بيكون سؤاله أبوخ منه.. مش بسبب نوع السؤال تحديدا، ولكن بسبب تكراره.. ولأن في الغالب الضيف مبيبقاش عنده حاجه يقولهالك.. فيقول السؤال التقليدي الممل: وإنت نفسك لما تكبر تطلع إيه يا حبيبي؟.. بصيت لكل الضيوف اللي قاعدين وأنا مراقب ترقبهم للنطق بأمنيتي.. وكأنهم هايسمعوا حاجة جديدة.. مع إن كل العيال في السن ده بيقولوا يا إما دكتور زي بابا.. يا إما مهندس زي عمو.. يا إما ظابط عشان أقبض علي بابا.. قصدي ع الحرامية.. المهم بصيت لهم وأنا كلي سعادة وحب وأمل.. بصيت لهم وأنا مبتسم وفاتح بقي من الضرس اليمين لحد الناب الشمال.. قولتها بصوت عال وبالفم المليان.. يا جماعة أنا..أنا.. أنا عايز أطلع.. أطلع.. مهندس.. الضيوف انتبهولي يا دوب في الزمن اللي قولت فيه الكلمة.. بصوا لي مع ميم المهندس، ولفوا وشوهم مع انتهائي من سين المهندس.. وعااااااااادي جدا.. كل واحد كمل اللي بيعمله.. اللي بيشرب حاجة ساقعة شرب.. واللي بيحط سكر للشاي كمل حططان.. واللي بياكل بياكل.. ولا كأني قولت حاجة.. ولا ماما زغرتلي ولا الضيوف ضحكوا.. فاتأكدت إن العربجي عنده حضور وكاريزما أكتر من المهندس بآلاف المرات.. واللي حصل ده كان دافع قوي إني أفضل مُصر علي رغبتي في الطلوع زي ما أنا عايز.. وكان كل ما حد يسألني نفسك تطلع إيه يا حمادة.. أقوله: عربجي.. فيضحكوا.. وماما تزغرلي.. والعربجي يكبر في نظري أكتر وأكتر.. وماما تزغر، والضيوف مهما يتغيروا.. برضه بيضحكوا.. والعربجي بيعلا ويعلا.. ولما ابتدي مستواي يتراجع في الدراسة.. مسكتني أمي وقالتلي وهي بتزعق: «لحد إمتي هتفضل بليد كده».. لازم تذاكر وإلا مستقبلك هايضيع وتترمي في الشارع.. إنت إيه نفسك تصيع وتبقي عربجي.. وهنا كان مربط الفرس.. سبت كل الهيصة اللي حاصلة دي.. وقولتلها: أيووووووووه.. ماله بقي العربجي؟ بقالي سنين طويلة عايز أعرف ماله العربجي؟ فهميني.. وبعد شوية صمت ونظرات اللي كان ناقصهم شوية مزيكا سسبنس.. بصت لي وقالتلي: إنت عايز تجنني صح؟.. امشي من قدامي الساعاتي.. قصدي الساعة دي.. دخلت الأوضة وبرضه معرفتش إيه الوحش في العربجي.. يا جماعة لو حد يعرف يقولي.. هو العيب فينا ولا في العربجي.. ليه الناس الضيوف ضحكوا عليا لما قولت نفسي أطلع عربجي.. ليه ماما زغرتلي لما قولتلها نفسي أطلع عربجي.. إيه اللي ضايقهم.. فيه إيه في العربجي يضايق.. ليه محدش عايزني أطلع عربجي؟ حد يرد عليا.. يا أخوانا يا ناس يا خلقه.. يا عالم.. ياهووو.. هوو.. هو.. هـ.. (تنهيدة) واضح إن مافيش إجابة.. وبرضه معرفتش ليه محدش عايزني أطلع عربجي.. مش جايز العربجي هو اللي مش عايز يطلع زيي.

مقالة أحمد حلمي يكتب سنة 1900

مقالة أحمد حلمي يكتب: سنة 1900 حاجة و 80.. ياااااااااااه

 

كانت معلوماتي عن كتابة المذكرات أن الكلام اللي مكتوب فيها بيودي الناس اللي مكتوب عنهم في داهية.. واللي بيكتبها بيتقتل في الآخر.. علشان كده كنت هامضيها باسم واحد صاحبي بيحب يتقتل

سنة 1900 حاجة و80 كان عندي شوية سنين ما يتعدوش الخمستاشر.. قررت أكتب مذكراتي، وكان الغرض الرئيسي من ورا كتابتها إني أودي الناس كلها في داهية لما انشرها.. ما هي دي كانت كل معلوماتي عن كتابة المذكرات.. إن الكلام اللي مكتوب فيها بيودي الناس اللي مكتوب عنهم في داهية.. واللي بيكتبها بيتقتل في الآخر.. علشان كده كنت هامضيها باسم واحد صاحبي بيحب يتقتل..
المهم.. بعد قرار كتابة المذكرات كان من الطبيعي إني أدور علي حاجة أكتب بيها.. فاشتريت تلات «تقلام» «أحمر وأزرق وأسود».. الأحمر علشان أكتب بيه أسماء الناس اللي هايروحوا في داهية علشان تكون أساميهم واضحة لما البوليس يقلب في الأجندة لأنه مش هايكون عنده وقت يقرا كل اللي مكتوب فيها.. والأزرق أكتب بيه عمايلهم الزرقة اللي هايروحوا في داهية بسبب زرقانها.. والأسود بقي هاكتب بيه نهايتهم السودة.. وبعد ما اشتريت «التقلام» اللي هاكتب بيها.. كان فاضل اشتري حاجة أكتب فيها.. فكانت الأجندة «الخضرا»..
وصحيت الصبح يوم 1900/1/1 حاجة و80 بعد ما نمت بدري قبلها بيوم عشان أصحي بدري آخد اليوم من أوله وأكتب قبل مايفوتني حاجة.. جبت «التقلام» اللي هاكتب بيها والأجندة اللي هاكتب فيها.. وفتحت الأجندة علي أول صفحة، وبصيت للأقلام الثلاثة المحطوطين قدامي علي المكتب.. احترت أمسك أنهي قلم.. الأحمر وألا الأزرق والا الأسود.. مسكت الأحمر.. طب اكتب اسم مين.. ده لسه مافيش حد عمل حاجة.. أنا الوحيد عملت - إني صحيت من النوم- طب أكتب اسمي! مش معقول أبقي أول واحد أوديه في داهية أنا.. وصحياني من النوم عادي.. لا فيه فعل أزرق ولا نهاية سودة.. بالعكس دي بداية يوم وبداية مذكرات.. فكان لازم آلاقي قلم بلون محايد أكتب بيه.. فتحت درج المكتب لقيت قلم رصاص مبري..
مسكته وبصيت لأول صفحة وكتبت.. «بسم الله الرحمن الرحيم.. إنه يوم الجمعة الموافق 1900/1/1 حاجة و80 استيقظت من النوم في تمام الساعة العاشرة صباحا لكي أبدأ في كتابة مذكراتي.. فجلست علي مكتبي ونظرت إلي الأقلام أمامي.. الأحمر والأزرق والأسود.. واحترت في اختيار واحد منها.. ففتحت درج مكتبي، فوجدت قلما «رصاص» فأمسكت به، وفتحت أول صفحة من الأجندة ونظرت لها ووجدت نفسي أكتب..

بسم الله الرحمن الرحيم.. إنه يوم الجمعة الموافق 1900/1/1 حاجة و80 استيقظت من النوم في تمام الساعة العاشرة صباحا لكي أبدأ في كتابة مذكراتي.. فجلست علي مكتبي ونظرت إلي الأقلام أمامي.. الأحمر والأزرق والأسود.. واحترت في اختيار واحد منها.. ففتحت درج مكتبي، فوجدت قلما «رصاص»، فأمسكت به وقلب أول صفحة من الأجندة، ونظرت لها ووجدت نفسي أكتب..بسم الله الرحمن الرحيم.. إنه يوم الجمعة الموافق 1900/1/1 حاجة و80 استيقظت من النوم.. إيه ده؟ ده أنا باعيد نفس الكلام تاني..
اكتشفت إن المذكرات لازم لها أحداث.. يا إما الأجندة هاتخلص وأنا لسة في مكاني.. والحدث الوحيد اللي عملته إني صحيت من النوم، وقعدت علي المكتب وبصيت إلي أقلامي.. الأحمر والأزرق والأسود، واحترت في اختـ.. يا دي النيلة أنا هاعيد نفس الكلام برضه؟! سيبت القلم الرصاص، وقلت لازم يبقي في أحداث اتحط فيها وأكتب عنها وعني.. وابتديت فعلا رحلة البحث عن الأحداث.. رحلة ابتدت من وقتها لحد النهاردة.. أحداث تشيلني وأحداث تحطني.. أحداث قصيرة تفرحني.. وأحداث طويلة تكئيبني.. مواقف حلوة بتعدي بسرعة البرق.. ومواقف حقيرة زي الشلالات مبتخلصش.. لحظات تمر كأنها سنين.. وسنين تفرط من عمرك كأنها ثواني.. رحلة طويلة لم تنته حتي هذه اللحظة.. رحلة خلصت فيها ورق لأجندات كتير.. إشي خضرا وحمرا.. ومن بعديهم لبني وسودة ونبيتي تحفة وكله ولا البني.. ولو شوفتوا بقي الزرقة.. تجنن.. كل الألوان.. أجندات لكل السنين..
من أول 1900 حاجة وتمانين.. لحد النهاردة.. وفجأة مش عارف إيه اللي خلاني أجيب كل الأجندات اللي كتبتها، وقعدت أقلب وأقرا بين أيامها المتنتورين علي صفحاتها اللي كانوا مبيضين وبقوا مزرقين علي محمرين.. ابتديت بالأجندة «الصفرا».. ومش هاقولكوا الأجندة كانت بتاعت سنة كام.. لأني اكتشفت إن ترقيم السنين مبيغيرش كلام كان مكتوب بقلم رصاص ابتدي بسن رفيع وانتهي بخط تخين.

«الأجندة الصفرا».. سنة من السنين.. صفحة 56.. مكتوب فيها: «بسم الله الرحمن الرحيم.. مقهي صغير يجلس عليه بعض المسنين.. كانوا بيتكلموا عن حنية وطيبة أيام زمان.. لما كان مافيش ولا دار للمسنين.. لما كان الابن والبنت حنينين.. عم متولي أب قديم عنده من السنين ييجي خمسة وسبعين.. شفط شفطة من الشاي، وقال لصديقه عم إبراهيم: إنت عارف يا إبراهيم الوحدة مخلياني ميت بالحيا.. نفسي خيري إبني يقولي تعالي أقعد معايا كام يوم .. عارف يا إبراهيم.. أنا مش هاروح.. بس نفسي يقولها.. إبراهيم قاله: متزعلش.. خلاص فاضل شهر ولا اتنين ويفتتحوا أول دار للمسنين.. يااااااااه يا خيري».

«الأجندة الزرقا».. صفحة 67.. مكتوب فيها: «أستغفر الله العظيم.. قالها الأستاذ جرجس لما قطعوا الشجرة اللي كانت بتظلل علي عربيته التمانية وعشرين.. أصلهم كانوا عايزين يطلعوا بالدور العشرين، وخلاط الأسمنت مش عارف يقف غير في الحتة اليمين بين الممرين.. اللي فيها شجرة الياسمين.. فقطعوا الشجرة وطيروا العصافير اللي كانوا فيها معششين.. يااااااااه يا شجرة الياسمين».

الأجندة «الحمرا».. صفحة 73.. مكتوب فيها: «حسبي الله ونعم الوكيل.. قالها شاب أسمر صعيدي لما شاف بنتين ببنطلونين محزقين من ضهرهم ماشيين.. سبقهم بخطوته علشان يغض العين.. شاف وشوشهم لقاهم شابين بشنبين.. متبنتين.. راح مأخر خطوته عشان مايشوفش وشهم اللعين.. وقال كنفسه ياريتني ما سبقتهم، وفضلت فاكرهم بنتين متحزقين.. يااااااه ياعين».

الأجندة «المحمحي».. صفحة 82.. مكتوب فيها: «لا حول ولا قوة إلا بالله.. لإمتي هانفضل ساكتين.. ولا هو يعني علشان ليه كرش سمين يقوم يعمل اللي عايزه وياخد حقنا ويخرج منها صاغ سليم.. أمال فين السين والجيم.. ولا الحرفين دول مخلوقين للسكات والجحيم.. فين قانون العدل يا محترمين.. ارحمونا من أبو كرش سمين.. ده دخل القسم وخرج منه زي الشعرة م العجين.. إن كان هو بني آدم طب ما إحنا كمان بني آدمين.. ومخلوقين زيه من طين.. ولا دي كمان هاتغيروها يا واصلين.. يااااااااه يا ساكتين».

الأجندة «الفحلقي».. صفحة 95 مكتوب فيها: «أعوذ بالله.. ده انت لو كافر يا أخي هاتكون أحن من كده.. دول ولاد أختك اليتامي المحتاجين.. واكل فلوسهم وعامل نفسك عليهم وصي وأمين.. وإنت حرامي وبتقول ولا الضالين آمين.. وأنا لسة سامعك بودني لخامس مرة بتسب الدين.. يااااااااه يا دين».

الأجندة «الفزدقي».. صفحة 103 مكتوب فيها: «وإحنا فايتين علي الحدود مستمرين في الصعود.. اختفي النيل الجميل من تحتنا.. والمدن والريف.. وأول عمرنا.. وابتدي شيء ينجرح.. جوة القلوب.. وابتدينا أسئلة مالهاش ردود.. نمنا عـ الشباك نخبي دمعة فرت مننا.. يا سلااااام علي فرقة الأصدقاء.. صحيح.. فين النيل والريف؟ فين عمرنا؟ وفين ردود الأسئلة؟ لإمتي هاتفضل تفر الدموع مننا.. يااااااااه.. أصدقاء».

الأجندة «البندقي».. صفحة 107.. مكتوب فيها: «بجنيه عيش.. بجنيه فول.. بجنيه طعمية.. بجنيه جبنة «أريش».. وربع جنيه شاي.. وربع زيت للفول.. ومش مهم الملح.. مر الأيام غانينا عنه.. ومش مهم الشطة.. كفاية حُرقة الفقر ملهلبانا.. وربع جنيه سيجارتين واحدة الصبح والتانية بالليل في البلكونة.. يبقي كده كام في اليوم يا عبد الرازق؟ أربعة جنيه خمسة وسبعين قرش.. قول خمسة جنيه بالعلاج والعلام والفسح.. إضرب بقي في تلات طقات.. يعني خمستاشر جنيه في اليوم يا عبد الرازق.. في تلاتين.. يعني ربعمية وخمسين جنيه في الشهر يا عبد الرازق.. كتير.. طب احسب علي طقتين كده.. يبقي تلتميت جنيه في الشهر يا عبد الرازق.. طب لو طقه؟! يبقي ميه وخمسين في الشهر يا عبد الرازق.. طب مافيش حاجة أقل من طقه؟! فيه.. إنك تطق تموت يا عبد الرازق.. يااااااااه.. أخيرا اتحلت».

الأجندة «البنفسجي».. صفحة 109 مكتوب فيها: «إنا لله وإنا إليه راجعون.. مات وهو بيشرب.. كان بيشرب ميه وشرق مات.. حد يصدق.. ده كان بصحته وعافيته.. كان زي الفل طول بعرض.. إيه اللي شرّقه وموّته؟.. أكيد حد جاب في سيرته فشرق مات.. حد!.. زي مين؟.. أي حد بيكرهه.. هو في حد بيكره؟ يااااااااه.. كتير.

لقيت في أجنداتي أسامي كتير محمرين.. وآلافات السطور مزرقين.. ومافيش ولا نهاية من النهايات المسودين.. الأقلام «الحمر» في درج مكتبي كتير فاضيين.. والأقلام الزرقة أنابيبهم مبيضين.. أما القلم الأسود اليتيم اللي من سنة حاجة وتمانين.. زي ما هو.. لا كتب حرف ولا كلمة ولا جملة علي أي حد من اللي أساميهم محمرين وأفعالهم مزرقين.. مع الزمن اتمسح الكلام اللي مكتوب بالرصاص.. وفضلت الأسامي الحمر علي ورق الأجندة متفرقين.. وسطور زرقة متجمعين زي كتل الدم في الجسم الأبيض محبوسين.. أما النهايات السودة ماتكتبتش.. أكتبها إزاي إذا لم تذكرها السنين.. وآخر أجنداتي كانت الأجندة البمبي أم سوستة.. بتاعة سنة 2000 و9.. حطتها فوق الرف مع إخواتها القدام الملونين.. وأبدأ سنة 2000 و10 ببسم الله الرحمن الرحيم.. وأجندة جديدة وقلمين تانيين.. أحمر وأزرق مليانين.

أحمد حلمي يكتب: وقت إضافي

تحت عنوان وقت أضافي حلمي يكتب

الثلاثاء, 2010-03-02 16:02

البني آدم بياكل وبيشرب وبينام وبيقضي حاجته في الحمام.. آه نسيت.. وبيشتغل.. طقت في دماغي أحسب حسبه كده عن البني آدم.. كام سنة بينامها من عمره.. الوقت اللي بيستهلكه في الشرب والأكل يطلع كام سنة.. بيقعد في الحمام كام سنة.. وبيشتغل كام ساعة.. قصدي كام سنة.. هاحسبها علي متوسط عمر البني آدم العادي اللي تقريبا بيكون عمره في حدود.. نقول سبعين سنة مثلا.. من أول ما يتولد لحد ما يموت.. نبتديها من أول ما العيل بيتولد.. من خبرتي التي لم تتعد الست سنوات في عالم الأبوة والتي اكتسبتها كأب، عرفت إن العيل لما بيتولد بينام أربع ساعات ويصحي أربع ساعات.. ولما بيصحي الأم بس هي اللي بتصحي معاه.. وأنا بافضل نايم طبعا.. أو بمعني أدق باصحي لمدة ثانية مع أول عياطة للعيل وأرجع أنام تاني أول ما أحط المخدة علي راسي تاني.. أصل أنا كمان خبرة في النوم.. كنا بنقول إن العيل في أول ست شهور بينام أربع ساعات ويصحي أربع ساعات.. يعني بينام حوالي أتناشر ساعة في اليوم وبيصحي أتناشر ساعة.. وده لمدة ست شهور.. يعني.. تلات شهور صحيان وزيهم نوم.. ولما العيل بيعدي الست شهور دول بيبقي خلاص.. زيه زي الكبار.. بينام تمن ساعات في اليوم.. نضرب بقي التمن ساعات دول في تسعة وستين سنة ونص يطلعوا تقريبا.. في الشهر 240 ساعة في الشهر.. يعني في السنة 2880 ساعة في السنة.. يعني في المدة كلها تقريبا 198720 ساعة نوم.. زائد النوم اللي في الست شهور اللي فاضلين يبقي الإجمالي 200160 ساعة في عمره كله.. لو قسمناهم علي أربعة وعشرين هانعرف عدد الأيام اللي بينام فيها البني آدم من أول ما يتولد لحد ما ينام للأبد.. يكون الإجمالي 8340 يومًا.. نقسمهم علي تلتمية خمسة وستين يوم يطلع 22. 849315 سنة.. ده من غير حساب اليوم الواحد والتلاتين من كل شهر.. يعني بالبلدي كده نقول حوالي تلاتة وعشرين سنة.. تلاتة وعشرين سنة نوم.. ده في حالة لو كنت بتنام تمن ساعات في اليوم.. شوف بقي لو بتنام عشرة أو 12 ساعة.. تلاتة وعشرين سنه نوم بس من غير أكل وشرب وتواليت.. نشوف بقي وقت الأكل.. لو بتاكل في اليوم تلات مرات.. والمرة بتستغرق حوالي مثلا عشرين دقيقة.. يعني ساعة في اليوم أكل.. يعني في الشهر 30 ساعة.. يعني في السنة 360 ساعة.. يعني في السبعين سنة 25200 ساعة.. يعني 1050 يومًا.. يعني 2. 8767123 حوالي سنتين وتمن شهور.. قول تلاتة لو كنت مفجوع شوية.. تلات سنين أكل.. نخش بقي علي التواليت.. والتوليت نوعين.. مية وطينة.. وكل حاجة وليها وقتها طبعا.. الإسهال السريع غير الإمساك الشنيع.. هانقول مثلا نص ساعة في اليوم للمية والطينة.. يعني إجمالي سبعين سنة يطلع حوالي سنة ونص من عمرنا بنعمل فيهم تواليت.. سنة ونص تواليت.. أما بالنسبة للشغل بقي.. فممكن نقول لو مثلا بتشتغل 6 ساعات في اليوم يعني في الشهر 180 ساعة.. يعني في السنة 2. 160 ساعة، ولأن طبعا محدش يشتغل أول ما يتولد ولا حتي أول ما يتخرج من الجامعة، فأكيد مش هانضرب في سبعين سنة.. ممكن نضرب في تلاتين سنة.. يبقي المجموع 64. 800 ساعة.. يعني 2700 يوم.. يعني 7. 3972.. قول تمن سنين.. تمن سنين شغل لو كنت هاتعيش سبعين سنة.. يعني إجمالي الأكل والشغل والنوم والتواليت يطلع تقريبا خمسة وتلاتين سنة وخمس شهور.. خمسة وتلاتين سنة للأكل والحمام والنوم والشغل.. تفتكروا الخمسة وتلاتين سنة الفاضلين ممكن يكفوا بقية الحاجات اللي أنا محسبتهاش.. زي السنين اللي بنقعد فيها علي القهوة والسنين اللي بنلعب فيها بلاي ستيشن.. والسنين اللي بنتعلم فيها من غير ما نستفيد من اللي بنتعلمه.. والسنين اللي بنم فيها علي خلق الله.. والسنين اللي بتضيع في الخناق.. والسنين اللي بنقفها في البلكونات.. والسنين اللي بندور فيها علي أماكن لركن العربيات.. وسنين الطوابير.. وسنين بنقنع فيها الأغبياء.. ده غير سنين الوقوف في الإشارات العادية وأمام كاميرات.. وسنين السكات والسرحان.. وسنين في الحقد وسنين في الحزن وسنين في الكآبة والغم وسنين المسلسلات والبرامج والريموتات والفضائيات.. وسنين التفخيد علي الشيزلونجات وسنين مجاملات وسهرات وأحزاب وسياسات وسنين في المحاكم وخناقات وتحكمات وحكومات وسنين في الأقسام والمستشفيات.. وسنين لاتخاذ القرارات وهجرات ووداعات وسلامات وسنين دموع وأحضان وقبلات في المطارات.. ونط وجري ورا الاتوبيسات والميكروباصات.. وسنين في علاج الميكروبات.. ودروس خصوصية وقعاد علي سلالم الكليات وشيشة وكافيهات.. ومين صحي ومين مات.. وأفراح وعزي وصلوات ودعوات.. وسرقه ونهب وفلان خد وكت والتاني مبيقولش غير هات.. طب ليه الدوخة الحسابية دي؟! ما تيجي نحسب الحاجات دي علي يوم واحد بس.. يعني تمن ساعات نوم.. ست ساعات شغل.. ساعة أكل.. ونص ساعة تواليت.. ساعة إلا ربع مسلسل.. بالإعلانات يبقي ساعة ونص.. ده لو كنت متابع مسلسل واحد.. نص ساعة تقليب في زراير الريموت علي ما تقرر اللي أنت عايز تشوفه.. ساعة علي الأقل علي ما توصل الشغل.. وزيها وأنت راجع.. طبعا الحسبة دي لو كنت بتشتغل يوم الجمعة والشوارع فاضية.. بس خلينا نقول ساعة رايح وساعة راجع مجازا.. طبعا ده من غير الإشارات، وإلا هابقي خيالي.. ومعاك نص جبنة.. قصدي نص ساعة فرجة علي خلق الله في الإشارات.. ونص ساعة بتدور علي ركنة.. ونقول ربع نميمة وربع حقد وربع سرحان وربع تفخيد في الشغل.. وخمس دقايق في كل صلاة سواء كنت مسلم أو مسيحي.. يعني خمسة وعشرين دقيقة عبادة.. قول نص ساعة بتفتكر فيهم ربنا.. وعندك يا سيدي ساعة ترفيه.. بلاي استيشن بقي أو قعدة علي القهوة أو بولة استميشن.. يا خبر.. أنا نسيت الموبيلات.. ربع ميسدات مثلا.. وساعة استقبال وإرسال.. وربع استهبال وهزار.. وربع حموم لو بتستحمي كل يوم.. ما تيجوا نحسب كده.. علشان مادوشكوش بحسابات.. أنا هاحسب وأقولكوا الإجمالي علطول.. ولو مش واثقين فيا.. إبقوا إحسبوا ورايا.. الإجمالي يا سيدي طلع.. 24. 45. . أربعة وعشرين ساعة وخمسة وأربعين دقيقة.. يعني خمسة وأربعين دقيقة زيادة عن الساعات اللي خلقها ربنا في اليوم الطبيعي.. يومنا مش مكفي.. يا نهار أحوس.. أمال هانلاقي فين وقت للتفكير والإبداع.. وقت للتأمل.. وقت للسعادة والفرح والقعاد مع العيال.. وقت لزيارة الأهل وصلة الرحم....؟! واضح إننا محتاجين وقت إضافي يا جماعة.

احمد حلمى فى جريدة الدستور بعنوان عصيدة عمصاء

مقالة الفنان احمد حلمى فى جريدة الدستور الثلاثاء

2010-03-09

بعنوان عصيدة عمصاء

محتار أكتب عن إيه؟.. لا أنا مش محتار أكتب عن إيه.. أنا محتار أكتب إيه أساسا! مفيش في دماغي أي حاجه أكتب عنها.. حاسس إن دماغي عاملة زي ما تكون أنبوبة غاز قاطعة النفس ومافيهاش ولا نقطة غاز.. قلبتها يمين وشمال ونيمتها علي جنبها وعلي ظهرها وبطنها.. جايز ألاقي فيها شوية كلام مكنونين في القعر يعملولي حتي سطر ولا سطرين يساعدوني في اللي هاكتبه، واللي أنا لسه لحد دلوقتي مش عارف هو إيه.. أصعب حاجة إن الواحد دماغه تبقي عاملة زي الأنبوبة كده.. تتفاجأ بأنها منفسة وفاضية بدون تمهيد أو سابق إنذار.. يا بختهم اللي عندهم غاز طبيعي!


أكتب عن إيه؟ بس.. لاقيتها.. أنا هاكتب شعر.. أو هاجرب أكتب شعر.. بس يا تري أي نوع من أنواع الشعر.. عامي ولا حر ولا نثر ولا جاهلي!.. أنا أكتب شعر حر علشان أبقي حر ومش متقيد ومرحرح كده وفاكك، وكل اللي ييجي في دماغي الفاضية دي أكتبه.. أنا هاكتب قصيدة.. أو بمعني أكثر صراحة هاكتب عصيدة.. وأتمني ألا يقرأ هذه العصيدة أي شخص له علاقة بالشعر من قريب أو من بعيد، حتي لا يتأذي من الحرية المطلقة والمجردة من كل بحور الشعر أو مدارسه أو قوافيه أو تفعيلاته التي سوف أبتعد عنها كابتعادي عن المطبات الصناعية في الشوارع.. ليس لأنني سأسلك مدرسة جديدة في الشعر، ولكن لجهلي بها.. أعتذر كل الاعتذار عما سيبدر مني وعما سأرتكبه في حق الشعر والشعراء.. أعتذر لأحمد شوقي وحافظ إبراهيم وجبران خليل جبران وأبو العلاء المعري وصلاح عبد الصبور والأبنودي وسيد حجاب وأمل دنقل وأحمد مطر ومحمود درويش وصلاح جاهين وبهاء جاهين وبهاء الدين محمد وأيمن بهجت قمر وإسلام خليل وبلحة العربي وزقلة المدرب.. أعتذر لكل إنسان ليس فقط يكتب أو يقرأ الشعر، بل حتي لو كان يادوب بيكتب اسمه.. أعتذر للكلام نفسه لأنني اغتصبته وأخرجته من تراصه فوق السطور بشكل طبيعي، وليس هذا فحسب، بل إنني حاولت انتهاك حقوقه ولي حروفه حتي أنظمها بشكل زجلي أو نثري.. أعتذر له عن هذا النثر الذي سأنثر مفرداته وأهدر نقاطها.. ومن المؤكد أنه كان سيأبي أن تنثر.. وأعتذر أيضا للكلمات التي سأخدعها وأوهمها أنني سأصنع منها شعرا عظيما متناسقا منظوما، ولن يكون إلا شعرا يشعرها بحجم الكذبة التي سأكذبها عليها.. ولو حاولت الحروف أن تتملص من القلم هربا من عشوائية شعري أو سذاجة أو ركاكة معانيه، سأغلق عليها القلم حتي لا تهرب.. وبالرغم من اعترافي الكامل بجريمتي الشعرية التي سأرتكبها في حق الشعر والشعراء والأدب والأدباء، واعترافي أن ما سأقوم به نوع من أنوع قلة الأدب، وبالرغم من أنني مازالت أمامي الفرصة للتراجع أو محو كل الأدلة التي ستدينني، بألا أرسل هذا المقال لكي لا ينشر، وأرسل غيره، ولكنني لن أكذب عليكم وأخبركم أن الوقت أصبح ضيقا علي كتابة مقال آخر.. أصبح الوقت ضيقا، ولكنني - مع ذلك - أملك غيرها جاهزا للنشر.. لقد بدأت كلامي معكم قائلا إنني أشعر بأن رأسي أشبه بأنبوبة غاز فارغة، ولكنني وجدتها مليئة، وأرجوكم أن تتوخوا الحذر حتي لا تنفجر في وجوهكم أثناء قراءة هذا الشعر الغازي الخانق.. وإليكم هذه العصيدة العمصاء التي وإن دلت علي أي معان، فستكون معان غير مقصودة، وربما مقصودة بدون قصد! وليكن هذا هو اسم العصيدة: «مقصودة بدون قصد»، فلنبدأ التلييف.. عفوا.. محاولات التأليف:


مقصودة بدون قصد..


مرصودة كل الرصد..


مكتوبة عن عمد..


عمرها من زمن مد..


مبحوحة من غير بح..


مدبوحة من غير سح..


منقوطة من غير نقط..


مغلوطة من غير غلط..


صعبان عليا حالك اللي اتقلب..


مسكين بجد تاريخك اللي اكتأب..


ميمك.. مالت من تقل همها..


نشيدك اتبدل بكلام غمها..


صادك.. صياد مشهور بالأسر..


روحك راحت في لحظة غدر..


راءك.. راقدة بلا قومة..


مش سامع عليكي لا صويتة ولا زووومة..


علمك ما بيرفرفش..


هواكي ما بيطيرش..


صعبان عليا حالك اللي اتقلب..


مسكين بجد تاريخك اللي اكتأب..


شايك ليه خشب وقهوتك بقت سادة..


عيشك بقي حطب وملحك زاد بزيادة..


أهلك؟.. مفتكرش.. دول غلابة وطينهم يابس..


ضحكهم مدفون في وشهم يائس..


مال عيالك كده كبروا قبل أوانهم بكتير..


وأما سألنا عن السبب.. حلفولنا إن ده تغيير..


العجز في وشوش شبابك بقّع..


والبكا في عيون عواجيزك برطع..


زمنك مارد بوش بارد منك مابينكسفش..


تميليه مهما يميل مابيتكسرش..


صعبان عليا حالك اللي اتقلب..


مسكين بجد تاريخك اللي اكتأب


يا خسارة ماضيك اللي اتكتب


خيرك ضاع وغيرك كسب..


واللي يحبك عاش كسبان مات بعد ما اتغلب..


جمالك بقي بس.. اسم


اتنقل من اسم لاسم..


لسانك فقد النطق


صراخك مرار في البق


نهارك من سكانك خاف واستخبي ورا السور..


ليلك من سرّاقك كره نفسه وبضلمته بقي مضرور..


العمي فينا بقي نعمة البصر.. والحكم بينا بالظلم انتشر..


شبابك العجز بقي فخرهم.. ومن حقهم


لكن بعد التحري أتسجن حلمهم..


إحنا شعب الأرض.. إحنا دم العرض


حتي لو فرضوا الموت علينا فرض..


الخرس بقي صوت الجرس.. والحمار ركب الفرس..


صعبان عليا حالك اللي اتقلب..


مسكين بجد تاريخك اللي اكتأب..


الإيد خايفه من السلام..


والبطن مبيشبعهاش كلام..


والدفا في البرد عمره ما ينام


الشفا للمرض بقي زي حب الملاك للشيطان


الفقر من كتر فقره اتقلب بلطجة


مليون تترمي في سهرة.. وعند الفقير البريزة معصلجة


الجهل في الفصول عشش.. والمخ في دماغ العيال مشش


الكبد تلف من كل حتة.. والطحال راكب له جلدة


القلب عايزله زقة والمعدة حيطانها لازقة


سرطان هد الجتة.. كبير صغير مش فارقة


تبرعات.. حسابات وحسابات


صرف أدويه بالألفات.. وإن معكش في بيتكوا تبات


وإن عيطت يبقي خلاص.. زيك زي اللي قبلك فات ومات


يا تدفع يا تمشي من سكات


وإن إداك فرصة هايسبقها بصلي علي النبي.. عليه أفضل الصلوات


عليه الصلاة والسلام.. فرصتي لحد فين


النهاردة الاتنين.. معاك لحد يوم التلات..


يا تدفع يا تبيع عيالك أو اكفر بمصيبة ربنا كتبهالك


صعبان عليا حالك اللي أتقلب..


مسكين بجد تاريخك اللي اكتأب..


عارف لما تشوف الصبح بيطلع.. وإنت قاعد..


لما تلاقي قلبك بيدق وإنت بارد..


أو تنام وأنت شارد.. وتجري وأنت واقف.. وتبكي وأنت ساكت..


عارف لما عنيك تشوف جوه ناس.. وتحس بإحساس..


عارف لما تبقي كل حاجه غلط صح.. وكل حلال حرام


المية تبقي نار والنار يبقي مطر


عارف لما تسكت وجواك مليان كلام.. وتتكلم وأنت مش طايق الكلام


تشوف الكدب من العنين باظظ


وإن اتكلمت هاتبقي عنيك بتشوف مش زي ما انت باصص..


تمشي مش زي ما أنت رايح..


تتمني تموت وأنت عايش..


أو تعيش بس مش علي الهامش..


لما تحس إنك نصين لحاجة واحده.. بس مش بتوع بعض..


نص برق والتاني رعد


لما الأوتار تعور السمسمية


والدم يبقي مية..


صعبان عليا حالك اللي اتقلب


مسكين بجد تاريخك اللي اكتأب..


شويه حريفة وشوية حرفجية.. شاطرين.. بس في الفورياجية


عارف ولا مش عارف..


تفتكر في كام واحد عارف إنه مش عارف..


وكام واحد عارف إنه عارف..


وكام واحد مش عارف إنه مش عارف..


وكام واحد مش عارف إنه عارف..


أهم حاجة إن سمير صبري عارف إنه.. سكر حلوة الدنيا سكر..


صعبان عليا حالك اللي اتقلب..


مسكين بجد تاريخك اللي اكتأب..


إحنا جواكي مسافرين وشوقنا للرجوع مكابر..


لا جوعنا شبع ولا حزننا فرح ولا مرضنا خف..


الجوع أفندي أتجوز ست الحزن.. وبكفن مرضهم اتلف..


أنا بس عايز حد يفهمنا.. هو إحنا مفروضين عليكوا ولا حاجة..


ربنا يكفيكوا شر مرض الحاجة..


عارفة إيه اللي موتنا.. الحاجة..


الحاجة أصعب حاجة..


الحاجة لحرف وسط كلمة مش عايزة تكمل..


الحاجة لصوت ميت جوة حلق مش عايز يطلع..


الحاجة لروح زهقانة من صاحبها ومش عارفة تطلع..


الحاجة لودن مرة تسمع..


الحاجة لقلب نفسه يخشع..


الحاجة لضمير ميكونش مُقنع..


ربنا يكفينا ويكفيك شر الحاجة..


قولنا نمشي لو مش عايزنا في حاجة..


انتهت العصيدة..


اعترف لكم إنني أحببت الشعر وكتابته.. ولن تكون هذه هي المرة الأخيرة لكتابة عصائد شعرية.. وأتمني ألا تكون هذه هي المرة الأخيرة التي تشترون فيها الجريدة.. وأخيرا وليس آخرا وبقدر اعتذاري المسبق عما كتبته.. بقدر تأكدي البالغ العاقل الحر بأنني شعرت بكل كلمة كتبتها في «قصيده بدون قصد».. في النهاية أدعو الله ألا يخرج وحي الإبداع والتأليف الخاص بتأليف الروايات من بيت إبراهيم عيسي أبدا، حتي يظل هكذا متفرغا لتأليف الروايات.. فينشر مقالي في الصفحة الأخيرة.. وربنا يكفينا دفء النشر في الصفحات الجوانية.

مقالة احمد حلمى فى جريدة الدستور بعنوان يوم عيد ميلادي

مقالة احمد حلمى فى جريدة الدستور بعنوان يوم عيد ميلادي

سؤال.. تفتكر يوم «عيد ميلادك» يبقي عمرك كده زاد سنة ولا نقص سنة؟ السؤال ده سألته لنفسي يوم عيد ميلادي.. يا تري أنا كده عمري زاد سنة ولا نقص سنة؟ «عيد ميلادي».. عيد ميلادي هو اليوم اللي أنا اتولدت فيه.. طيب ليه بقي اليوم اللي أنا اتولدت فيه يبقي عيد؟ ليه عيد؟ ومين اللي حدد إذا كان عيد ولا مش عيد؟ بني آدم اتولد في أي يوم من أيام السنة.. إيه العيد في كده؟!.. إنك اتولدت! أهلا وسهلا يا سيدي.. واحد اتولد.. حاجة عادية جدا.. زيك زي كل الناس اللي اتولدت علي الكرة الأرضية من يوم ربنا ما خلقها وخلقنا.. وهو لو يوم عيد.. إشمعني ليك إنت؟ المفروض أنه يكون يوم عيد لأبوك وأمك اللي بالنسبة لهم أكيد هايبقوا فرحانين ومزقططين بيك وبخلفتك، وخصوصا لو كان بقالهم كتير مستنيين إن ربنا يأذن بتكوين حضرتك.. وعلي فكرة مش بالضرورة يبقوا فرحانين أوي.. يعني في حالة لو كان مرتبهم نص نص ممكن يبقوا فرحانين نص نص برضه.. والفرحه هاتقل عن النص لو كنت أنت العيل الخامس ولا السادس في ترتيب أخوات حضرتك.. وياعالم هاتبقي إنت آخر العنقود، فاهتتدلع ولا العنقود هايكون لسه متقفلش وفاضله عيل ولا عيلين كمان علشان يتقفل.. وممكن مايكونوش فرحانين بيك خالص، وخبر بداية وجودك يكون سبب في خناقة كبيرة بين أبوك وأمك اللي كل واحد فيهم هايحاول يبرأ نفسه من سبب حدوثك، اللي مش وقته خالص، لأنهم لسه مش مستعدين لمصاريف خلفة سيادتك.. ومش بعيد أبوك يجبر أمك تنزلك ومتجيش أصلا.. ومين عارف.. ده ممكن أمك تنزلك من غير ما تقول لأبوك.. بس أنا هافترض بقي إن أبوك وأمك ميسورين الحال ومستنينك بفارغ الصبر وإنك فعلاً اتولدت وجيت ونورت البيت.. وطبعًا أكيد هاتتولد في شهر عادي من شهور السنة، وفي يوم من الأيام العادية المعروفة بتاعة الأسبوع اللي كل ما هايهل علينا هاتقول النهاردة عيد ميلادي.. عيد ليه؟ المفروض الواحد يقول النهاردة يوم ميلادي.. أو ذكري يوم ميلادي.. أو يا جماعة أنا اتولدت في يوم زي النهاردة.. وخلاص، ولو عايز تحتفل بذكري ميلادك، يبقي قول النهاردة أنا هاحتفل بذكري يوم ميلادي.. مش «بعيد ميلادي".. إيه البارانويا دي؟ مين اللي حدد إن اليوم اللي حضرتك اتولدت فيه عيد؟ إنت مين أصلا؟ واحد عادي.. إنسان مولود من كذا سنة.. عملت إيه مهم في حياتك علشان تخلي يوم ميلادك، عيد تحتفل بيه إنت وأهلك وأصحابك؟! وحتي لو قلت أنا هاحتفل بيوم ميلادي مش عيد ميلادي.. تحتفل بيه ليه من أساسه؟.. حصل إيه يعني لما اتولدت؟ أكيد كنت بتعيط وصوتك مزعج، ومش عارف تقولنا إنت بتعيط ليه، وأبوك وأمك مش عارفين يفهموك، ولا يناموا منك، وبتعملها علي روحك أو علي رجل أي حد من اللي شايلينك، وريحتك وحشه وبتريل وبتقشط وبتتكرع في وش أي حد، ودايما قارفهم ومشتت تفكيرهم ومخلي عينهم وسط راسهم لتقع ولا تتخبط.. ونايم وسطهم ومشاركهم في سريرهم.. لا عارفين يتقلبوا ولا يناموا، ولا حتي يحضنوا بعض.. وإن نمت علي سرير لوحدك هاتاخد مخدتين.. واحدة يمينك والتانية شمالك علشان ماتقعش وإنت نايم.. ناقص يحجروك بحجرين.. ده غير بقي السخونية والحصبة والإسهال والتطعيم والجفاف والتسنين.. صحيح خلفتك نعمة من عند ربنا.. نشكره عليها آلاف المرات والمرات.. بس بصراحة تربيتك مقرفة ومتعبة.. وفي الآخر تضحك عليهم بضحكة طفولية تنسيهم كل القرف اللي عملته فيهم وشافوه منك، وخصوصا أمك اللي بالرغم من كل اللي شافته وشايفاه ولسه هاتشوفه منك، ماتستحملش الهوا عليك.. أهي هي دي اللي المفروض يبقي ليها عيد صحيح زي عيد الأم فعلا.. عيد واضح وصريح ومفهومة أسبابه.. عيد بنحتفل بيه بالأم العظيمة اللي ربتك وشالتك وسهرت عليك وحملت فيك تسع شهور بتتقلب وتتوجع ونفسها تغم عليها بسبب إن حضرتك مضايقها في بطنها تسع شهور.. كتك القرف يا أخي.. عارف يعني إيه تسع شهور.. يعني 270 يوم.. إنت تقدر تشيل قزازة مية في إيدك مش في بطنك لمدة يوم واحد؟! تفضل قايم قاعد خارج داخل صاحي نايم بيها؟! أتحداك.. ده أنت من أول ساعة يا هاتشربها يا هاتكبها في أقرب حوض، وتطوح القزازة في أقرب صفيحة زبالة.. لو إنت شايف إنك ضروري تحتفل بيوم ذكري ميلادك، يبقي تعالي نرجع الحق لصحابه.. يبقي من باب أولي إن ابوك وأمك هما اللي يحتفلوا بيه.. مش إنت.. يحتفلوا بالذكري العظيمة اللي ربنا إداهم فيها نعمة اسمها الخلفة.. وأنا أقصد الخلفة كخلفة في حد ذاتها.. يعني مش شرط تكون إنت النعمة دي.. مين عارف ما أنت ممكن تكون نقمة عليهم، وتدوخهم السبع دوخات ما بين مصاريف وتعليم وعلاج وهدوم وأكل.. وممكن جدا في الآخر تبقي فاشل وصايع وضايع.. لا نافع فيك تعليم ولا دروس.. وتقولي أحتفل بعيد ميلادي! يا عم روح.. واللي يجننك بقي أنه في يوم عيد ميلادك العظيم ده كمان يجيبولك هدايا.. علي إيه؟ الهدايا دي كلها المفروض يجيبوها للراجل والست اللي صرفوا عليك دم قلبهم.. هما اللي ياخدوا الهدايا كنوع من التعويض المعنوي علي اللي شافوه منك، وتعويض مادي عما صرفوه عليك.. يبقي هما اللي بيستنوا اليوم ده مش إنت.. إنت المفروض يوم عيد ميلاك ده تقضيه إعتذار للي أنت عملته فيهم.. تبوس إيديهم ورجليهم ودماغهم، وتقولهم سامحوني وأوعوا تزعلوا مني.. أنا كنت عيل ومش فاهم حاجة.. المفروض تسهر طول الليل تدعي ربنا إنهم ينسوا ويسامحوك.. مش تقولي عيد ميلادي.. يا راجل روح.


ولو عايز يبقي ليك عيد ليوم ميلادك تحتفل بيه وتهيص وترقص وتزغرط حتي.. يبقي في حالة واحدة.. يوم ما نقول الحمد لله إنك اتولدت للدنيا وللبشرية عشان إنت عملت حاجة مهمة ومفيدة للناس اللي حواليك أو للبشرية عموما.. ساعتها إبقي إعمل 100 عيد ليوم ميلادك.. يوم ما نقول الحمد لله إنك اتولدت في اليوم ده، لأن لولا ميلادك.. ماكانش بقي عندنا أول واحد يطلع القمر، ويكون مصري.. مثلا.. لما نقول الحمد لله إنك اتولدت في اليوم ده، وبقي عندنا أول واحد اخترع القنبله الذرية.. مثلا.. يوم ما نقول الحمد لله إنك اتولدت لأنك سند لأبوك وأمك.. يوم مانقول الحمد لله إنك أعظم وأهم دكتور مصري في العالم.. لما الحالة دي تتحقق نقول الحمد لله إن حضرتك اتولدت.. ساعتها إعمل ألف عيد ليوم ميلادك.. احتفل بيه لما تبقي عامل في حياتك حاجة مفيدة ومهمة.. ساعتها قول بعلو صوتك هو ده اليوم اللي اتولدت فيه.. ساعتها هاتعرف عمرك زاد سنة ولا نقص سنة.. يوم ذكري ميلادك.. ابقي فكر قبل ما تطفي الشمع إنت عملت إيه في السنة اللي فاتت.. لو لقيت عمايلك بيضة وإيجابية.. ابقي زود شمعة علي شمع سنينك اللي أنت حاططهم في تورتة عمرك.. نص كبايتك هايبقي مليان.. هاتعرف إن عمرك زاد سنة مفيدة.. وساعتها هاتفكر في يوم ميلادك الجاي وإزاي يبقي عيد ميلاد مش يوم ميلاد.. يوم تزود فيه شمعة.. أما بقي لو لقيت نفسك مش مفيد ولا مهم ولا ليك لازمة وعمايلك سلبية وسودة.. علطول شيل من شمع سنينك شمعة.. نقص من عمرك سنة عدت من غير ما تعمل فيها أي حاجة مهمة.. وساعتها لازم تعرف إن عمرك نقص سنة، وكل سنة هاينقص سنة.. إعرف إنك عايش لورا مش لقدام.. إعرف إنك بجد بتستهبل فعلا.. إنت وشمعك وتورتتك.. إعرف إنك لا تمتلك من الكباية إلا النص الفاضي.. وإياك تهوب أو تبص علي النص المليان.. عارف ليه؟ لأنه بتاع واحد بيحتفل بعيد ميلاده.

أحمد حلمي يكتب: مقالة عسل أبيض

أحمد حلمي يكتب: مقالة عسل أبيض

الثلاثاء, 2010-01-19 19:24


ما أحلي اللقاء وما أصعب الفراق.. كان لقائي به لأول مرة مرحاً ومبهجاً.. لا يقل مرحاً عن ابتسامته المشرقة التي تُظهر بياض أسنانه.. ولا يقل بهجة عن تلك البهجة التي تنبعث من قلبه.. قلبه الذي باتت دقاته تضعف تدريجيا حتي توقف عن كل شيء.. عن الحياة أولا والبهجة ثانيا والطيبة والتسامح والإيمان ثالثاً، ولك أن تتخيل ما كان يملأ قلبه المتوقف هذا حتي تاسعاً وعاشراً.. توقف قلبه غادراً بالحياة ومغادراً منها.. توقف قلبه ملوحاً ومودعاً لكل الأيام التي لن يعيشها.. أيام لو كانت طيبته تنبض فيها بدلا من قلبه.. لبلغ من العمر أرذله.. كان لقائي به في مكتبي مرحاً ومبهجاً.. سأله الساعي: ماذا تشرب؟ فقال: قهوة مظبوطة، وقبل أن ينصرف الساعي لاحقه بـ «لو سمحت»، فتوقف، فقال له: في كباية مش في فنجان.. وحاول تحافظ علي الوش.. وعلي نار هادية وحياتك.. عرفت أنه كييف قهوة، فقلت للساعي: إذن اعملها من البن بتاعي، وقبل أن ينصرف الساعي أوقفته بـ «بقولك إيه»: اعملي أنا كمان قهوة، فقال هو للساعي: «اعملها له من البن بتاعي»، فضحكت، وضحك، وضحك الساعي.. لم تمض دقائق علي انتهائي من شرب قهوتي، ولكن طريقة طلبه القهوة شجعني علي أن أشرب معه فنجاناً آخر.. قهوته كانت مظبوطة.. مثل كلامه وملابسه وشخصيته التي ظهرت من أول لقاء لي به.. وقهوتي أشربها زيادة.. كالترحيب الذي رحبت به.. ليس لأني أعرفه، ولكن لأني شعرت أنني أعرفه.. جلسنا سويًا نتحدث عن الفن والحياة.. حكي لي كيف كان يحب التمثيل من صغره.. كان حُلماً بالنسبة له.. ولكنه كان كابوساً بالنسبة لوالده.. كان رافضا وغير مؤيد لحلم ابنه الذي لم يكن قد ولد بعد.. وكبر الابن وظل الحلم قابعا داخله في انتظار أن يُولد.. ووُلد الحلم أخيراً وهو جالس معي.. ولد حلمه عندما عرف أنه سيقوم بتمثيل دور في الفيلم الجديد.. كان حلمه ضاحكاً مثله.. مبتسماً مثله.. نظرت له فوجدته يبدو كالطفل المحبوس الذي خرج إلي حديقة شاسعة.. لم أر من قبل رجلاً في مثل سنه يبدو كالأطفال هكذا.. لو لم أكن متأكدا أنه يجيد الكلام والمشي لشككت أنني أجلس بصحبة طفل يشرب القهوة.. حكي لي عن حلمه الصغير الذي ولد لتوه.. قال لي إنه «يحب الثمثيل وكان يريد أن يصبح ممثلاً».. وفي الغالب تقترن كلمة «مشهوراً» بـ«ممثل».. ولكنه قال «ممثلاً» فقط.. لم يكن يطمح إلي الشهرة، ولكنه كان يطمح إلي التمثيل فقط.. كان سيمثل دوراً مع الراحل أحمد زكي في أيام الشباب، ولكن والده رفض كما كان رافضاً حلمه.. كان يبحث تارة وينتظر تارة عن فرصة يمكن أن يُولد حلمه علي يديها.. ولكنها كانت لا تأتي.. وإن أتت فإنها لن تنتظر حتي يغير والده رأيه من الرفض للموافقة.. فترحل الفرصة.. زهق الحلم بداخله، ولكنه لم يتركه ويرحل، ولم يمت ولم يتبدل بحلم آخر.. كمُنْ وسكت بداخله حتي ولد بعد أن أصبح صاحبه في الثامنة والخمسين من عمره.. أخذ يقلب فنجانه ثم شرب آخر رشفة فيه.. ووضعه أمامه وقال لي: «أنا مش هامثل».. فاجأني بقوله هذا الذي لو كنت صبرت لحظات لوفرت تلك المفاجأة لشيء آخر ربما لا يستحق المفاجأة بقدر ما تستحقها هذه العباره التي فاجأني بها.. في هذه اللحظات التي لم أصبرها نظرت له وأنا حيران.. وقلت لنفسي: «مش هايمثل» بعد كل هذه الحكايات عن حلمه.. ماذا يقول هذا الرجل، هل أتي إلي هنا ليشرب القهوة فقط ويغادر؟!.. إذن لماذا أخذ السيناريو وأضاع وقته في قراءته؟.. لماذا عشمتنا بأنك ستمثل دور والدي في الفيلم؟.. وزاد العشم عندما وجدته يشبهني كأنه والدي وأنا ابنه.. أو بمعني أدق أنا الذي أشبهه.. «مش هايمثل ليه؟» هل مازال والده علي قيد الحياة ويريد أن يأخذ رأيه؟ أم ربما أخذ رأيه ولم يوافق.. وأتي ليعتذر، ولكنه أصبح الآن كبيرا لدرجة تجعله يفعل ما يريد وفي أي وقت يريده.. أم أنه ينفذ وصية والده في ألا يمثل أبدا حتي بعد مماته.. عندما وجدت نفسي قد غرقت في بحر من الاستفهامات التي من الواضح أنني لن أجد لها طوق نجاة أو منقذاً سوي أن أسأله هو شخصيا ومباشرة، فسألته: يعني إيه مش هتمثل؟ قالي: «يعني إن شاء الله هاكون طبيعي جدا في دور الأب.. أصل أنا أب وولادي في مثل عمرك.. وهذا سيجعلني طبيعيا في الدور.. لذلك فأنا أشعر بأنني لن أمثل».. قلت لنفسي: حمدًا لله علي أن تفكيري وأسئلتي واستفهاماتي لم تكن مسموعة، وإلا كان قد اعتذر عن الدور والفيلم بسبب تسرعي وغبائي، فتحت جملته تلك التي فاجأتني بابا جديدا للحديث عن أولاده.. هؤلاء الذين كان وجودهم في حياته سببا أساسيا في أنه لن يمثل.. أو بمعني أوضح حتي لا يقع أحد فيما وقعت فيه.. إنه سيكون طبيعيا في دور الأب.. وقد كان.. كان أبا حقيقيا.. في التمثيل وخارجه.. أحببت هذا الرجل أقل بكثير مما أحبني.. واحترمته أكثر بكثير من حبه لي.. انتهي الفيلم الذي كان سببا في ولادة حلمه.. كان دائم النصح لي كالأصدقاء المقربين.. كان صديقي الكبير.. وكان دائما ما يستشيرني فيما يعرض عليه من أدوار.. فشعرت بأنني أبوه الصغير.. أبوه الذي لم يرفض حلمه.. قال لي يومًا: «نادني باسمي ولا تسبقه بألقاب»، فقلت له: «لو كان ذلك سيزيد من صداقتنا فليس لدي أي مانع، وإن كنت تريد ذلك حتي لا تبدو كبيرا في السن، فليس لدي مانع أيضا»، ولكنه قال لي: «لا هذه ولا تلك.. فأنا أريد أن أناديك باسمك دون ألقاب، ولكني لا أستطيع فعلها طالما أنت تناديني بالأستاذ»، فقلت له: «من هذه اللحظة أنت ليس بأستاذ، ولا أنا كذلك»، ولكنني سألته عن السبب والمغزي وراء طلبه هذا، فقال لي: «هذا سيساعدني أكثر علي أن أبدو طبيعا في تجسيد دور أبيك.. فأنا لا أنادي ابني بـ«يا أستاذ» أبدا مهما حصل..»، فقلت له.. «هل تشتم ابنك أحيانا؟» فقال لي: «طبعا.. أشتمه جداً وهزاراً»، فقلت له: «إذن لو شعرت بأنني ابنك فعلا، ونحن نمثل أمام الكاميرا، فلتقل لي ما تقوله لابنك جداً كان أو هزارًا».. وبدأنا التصوير وأنهيناه، وجسد دور الأب بإتقان.. ولم ينادني إلا بـ«يا أستاذ».. ولم يسمح لي أن أناديه إلا باسمه.. محمود الفيشاوي.. الأستاذ محمود الفيشاوي.. صديقي الكبير.. هذا الأسمر الطويل النحيل المرح الضاحك الراحل.. رحل قبل أن يكبر حلمه.. قابلته أول مرة بشوشا مرحاً يحب الناس والحياة.. وقابلته آخر مرة، فرأيته أكثر مرحاً وحباً للحياة.. ولا أعرف لماذا قال لي: «لا تجعل شيئا يضايقك.. إن الحياة لا تستاهل» أعطاني «برطمان» من العسل الأبيض ورحل.. وكان هذا آخر يوم رأيته فيه وسمعت صوته.. وفي اليوم التالي فتحت تليفوني، فوصلتني رسالة منه.. كان قد أرسلها قبل اليوم الذي رأيته فيه بيوم واحد.. قرأت الرسالة فوجدتها كالآتي.. «عزيزي أستاذ أحمد.. أنا جايلك بكره التصوير، وجايبلك معايا برطمان عسل أبيض، لأن أكيد البرطمان اللي عندك زمانه خلص». يحزنني كثيرا أنني أتحدث عنه بلفظ كان، ولكنها مشيئة خالقه.. وهذه هي الحياة.. وهكذا يكونون بعض من يملأونها.. أشخاص يحذرونك من غدرها فتغدر بهم.. يطلبون منك أن تُقبل عليها وتبتعد هي عنهم.. هذا الإنسان لم أكتب عنه لأنه ممثل مشهور أو نجم لامع.. فهو لم يكن كاتبا مرموقا.. لم يكن سياسيا أو عالما مثابرا، لكنه كان إنسانا.. إنسان مشهور بابتسامته.. لامع بحبه للآخرين.. مرموق بطيبته.. مثابر في صبره علي حلم.. ظل سنينا طويلة ينتظر ولادته.. وعندما ولد تركه ورحل، فمات الحلم معه، وهو مازال رضيعا.. محمود الفيشاوي.. الله يرحمه.. الفاتحة عليه وعلي حلمه.

أحمد حلمي يكتب: أبطال البطالة

أحمد حلمي يكتب: أبطال البطالة

الأربعاء, 2010-03-17 12:28


جيب ورقة بيضة أو متسطرة واكتب رقم بطاقتك.. وياريت يبقي الرقم القومي لأنه طالع موضة جدا دلوقتي.. ومعلش اكتب كمان شهادة التخرج وسنة التخرج احتياطي.. جايز تنفع

مطلوب موظف.. مطلوب موظفة.. كتير مننا زمان قروا العبارة دي، وخصوصا علي فتارين المحلات.. راحت فين العبارة دي دلوقتي.. اختفت؟ مع إن المحلات لسه زي ما هي موجودة.. دلوقتي العبارة اتحولت لـ «مطلوب وظيفة خالية».. الشغل بقي مشكلة.. مابقاش في شغل، ولأن الناس مش لاقية شغل.. ابتدوا يشتغلوا بعض.. ده حتي بقي مصطلح دلوقتي.. تلاقي واحد بيقول لواحد تاني: «ده اشتغالة».


نفسي أعرف إيه مشكلة «مشكلة البطالة».. أصل البطالة دي مشكلة.. هي نفسها عندها مشكلة.. فده معناه إن إحنا لازم نحل المشكلة اللي عند مشكلة البطالة، وبعدين نحل مشكلة البطالة نفسها.. أنا تقريبا تهت وتوهتوكوا معايا.. أنا آسف مش هاعمل كده تاني.. أنا باشوف الناس اللي عندهم بطالة عايشين في بطولة.. كونهم مستحملين البطالة.. ده في حد ذاته عمل بطولي.. ولو تأملنا كلمة «بطالة» و«بطولة».. هاتلاقي إن الفرق بينهم حرف.. شيل الألف وحط واوا.. هاتتحول الكلمة بسهولة من بطالة لبطولة.. طب فين المشكلة بقي؟.. ما حلها سهل جدا أهو.. أتحولت في لمح البصر من بطالة لبطولة.. لو فيه حد في حالة بطالة، وعايز يبقي في حالة بطولة يشيل ده من ده يرتاح ده عن ده.. وعجبي.. العاطلين بقوا كتير.. كتير أوي.. ولو دورت عليهم هاتلاقيهم في أماكن كتير.. هاتلاقيهم قاعدين علي القهاوي بيتفرجوا علي اللي رايح واللي جاي.. واللي ماعهوش حق كباية الشاي هاتلاقيه واقف علي الناصية.. العاطلين هاتلاقيهم قاعدين علي منتديات الإنترنت بيحاولوا يضيعوا وقتهم.. قال يعني في حاجة مفيدة.. العاطلين هاتلاقيهم سرحانين في أسقف غرفهم ليلا متخيلين أشكال لأحلامهم في تلك الأشكال التي صنعها تقشير البياض بفعل الزمن، فتهاوت وظهر من خلفها خرسانة السقف المسلحة التي أصبحت أضعف بكثير من خرسانة هذا الزمن المسلح بكل قوانين الهبل.. لقد لانت الخرسانة السقفية من أحلام ساكني غرفها، ولم تلن تلك الخرسانة الزمانية، ولم يفكر حتي سيخا واحدا فيها بأن يلين.. تشقق الطلاء، وسقط عليهم بأحلامهم التي لم تتعد حدود سقف الغرفة.. سقطت عليهم وهم يرسمون واقعا خياليا هشا بخطوط شقوقها، فهذا خط يرسم زوجة، وآخر يميل وينحدر بقوة مع هذا الشق العمودي، فيرسم وظيفة، وآخر يرسم منزلا بحديقة صغيرة.. وشقا يرسم ولادا وبناتا ولدوا من صلب شق آخر.. وهذا شق صغير يولد بين الشقوق ويرسم أملا في تحول الشقوق إلي واقع، ولكن يا آسفاه.. ما هي إلا شقوق، ولن تبدو غير ذلك مهما كانت عظمة تخيلهم.. عاطلون يقرأون أحلامهم من شقوق أسقف غرفهم، والتي لا تختلف كثيرا عن قراءة خطوط القهوة في فنجان بين أصابع دجال أو دجالة من دجالين هذا الزمان الأهبل.. أحلام كثيرة يقرأونها ولا يعيشونها إلا في السقف.. ويا خوفي أن ييأس خيالهم ويضمر، فيتحول إلي شقوق ترسم قبورا.


أعتقد أنه لكي يتم حل مشكلة البطالة لابد وأن تتوفر ثلاثة عناصر.. اثنان منها غير مهمة بالمرة، وثالثها أهمها.. لو لم يتحقق وجوده، فلا أهمية لسابقيه من العناصر.. أول هذه العناصر هو وجود عاطل يريد العمل.. وما أكثرهم.


ثاني هذه العناصر هو وجود عمل لكي يعمل به هذا العاطل.. ثالث عنصر وأهمها كما سبق القول، هو وجود واسطة تؤهل هذا العاطل للعمل، بحيث يمكن أن يخطف الوظيفة من الألف العاطلين أمثاله، ولو توفرت هذه العناصر الثلاث، يمكن حل مشكلة البطالة لأي عاطل.. طيب اللي معندوش واسطة يعمل إيه؟! سهلة.. يدور علي واسطة يجيب بيها واسطة، ولو معندوش.. ممكن يجرب يحل مشكلة البطالة لنفسه، والحقيقة أنا جت في دماغي فكرة عبيطة.. بس هاقولهالكو، وياريت ما تقولوش عليّ عبيط.


لو إنت مثلا جبت ميت سنارة وحطيتهم في النيل.. إنت مش هاتجيب ميت سنارة ولا حاجة.. أنا باضرب مثل.. تفتكر مفيش ولا سنارة من الميه دول ممكن تغمز.. أشك.. جايز مفيش ولا سنارة هاتغمز في أول ساعة أو تاني ساعة.. بس أكيد ممكن تغمز حتي لو مش في نفس اليوم خالص.


طيب علي غرار المثل السابق.. لو جبت ورقة بيضة أو متسطرة - علي حسب لو كنت بتحب السطور أو البياض أكتر- اللي يريحك، وكتبت علي الورقة دي اسمك وسنك وعنوانك.. اكتب فيها: أنا شاب مصري اسمي فلان الفلاني.. نفسي أشتغل ومستعد أشتغل من غير مرتب أول تلات شهور، وبين قوسين أكتبلهم «جربوني».. أكتبلهم إن كل اللي أنت عايزه مصاريف المواصلات وعلبة سجاير لو كنت بتشرب، وقولهم يسلموك علبة السجاير مفتوحة علشان مايشكوش إنك ممكن تكون مابتدخنش وعايز العلبة تبيعها.. أو يدولك سيجارة كل ما تعوز.. وطبعا متنساش تكتب رقم بطاقتك.. وياريت يبقي الرقم القومي لأنه طالع موضة جدا دلوقتي.. ومعلش أكتب كمان شهادة التخرج وسنة التخرج احتياطي.. جايز تنفع.. وصور الورقة دي بعدد السنانير اللي إنت مش حاططهم في النيل أصلا.. وجمع أكبر عدد من العناوين.. عناوين لشركات ومحلات ومطاعم وقري سياحية.. اللي تلاقيه قدامك.. وابعتلهم الطلب.. وخليك رخم.. تفتكر لو بعت لميت عنوان.. مفيش ولا عنوان من دول ممكن يغمز.. أشك.. ولو مغمزش.. أبعت لغيرهم تاني وتالت.. لازم يبقي عندك أمل وإصرار ورخامة.. أنا أعرف ناس كتير سبب شغلهم رخامتهم.. المهم يكون عندك أمل.. ولو حصل واشتغلت بالطريقة اللي من غير مرتب دي.. اقتل نفسك واثبت وجودك وحب الشغل كأنك بتاخد خمس تلاف جنيه في الشهر.. إنسي الفلوس ولو أول تلات شهور بس.. تفتكر لما صاحب الشغل يلاقي واحد مش هاياخد مرتب وبيشتغل بذمة وضمير زيك كده.. مش هايتمسك بيك؟! ده أكيد عمره ماهايفكر يفرط فيك أبدًا، وساعتها بقي.. تلعب الدنيئة.. تطلب مرتب حلو يا حلو.. يا إما تسيبله الشغل أبو بلاش ده وتمشي.. ساعتها هايديلك مرتب يا إما هايقول في ستين داهية.. وده معناه إنك لازم تمشي وتتخلي عن رخامتك لأنه طلع راجل أرخم منك.. ورخم علي رخم مايرولش، وساعتها يبقي مقدامكش بقي غير الطريقة التقليدية.. اللي هي.. إنك تبص للشهادة بتاعتك.. شهادة الجامعة اللي متخرج منها، وتركنها علي جنب، وتفكر إزاي تشتغل حاجة ملهاش أي علاقة بالشهادة.. ياما ناس كتيرة اشتغلوا شغلانات مالهاش أي علاقة بدراستهم.. اللي خريج حقوق وبيشتغل في السياحة.. واللي خريج تجارة بيشتغل في المقاولات.. واللي خريج آداب وبيشتغل طيار.. قصدي في المطار.. صحيح كل دول اشتغلوا عن طريق الواسطة.. بس أكيد فيه أمل.. المهم تركن الشهادة علي جنب.. وتمسك جورنال الأهرام مثلا، وتفلي صفحة الوظائف الخالية، ولما تزهق ممكن تاخد استراحة وتقرا كام خبر في صفحة الرياضة.. ولو مالكش في الرياضة وأنا أشك.. يبقي أقفل الجورنال وريح عينك شوية من الخط الصغير اللي مكتوب بيه باب الوظائف الخالية.. وارجع تاني دور جايز تلاقي وظيفة.. ولو إني أشك.. بس جايز، ولو مالقتش جرب في جورنال تاني.. صحيح إنك ممكن تلاقي نفس الوظايف اللي في الجورنال التاني هي هي اللي في الأولاني.. بس جايز تلاقي وظيفة مش متشابهة، ولو أني أشك.. بس عموما أنا عايزك تتفاءل من موضوع الشك ده.. لأنك طالما أنك بتشك.. إذن أنت موجود.. ولو شكيت إنك موجود.. ممكن تتأكد من صفحة الوفيات.. وأتمني إنك ماتلاقيش اسمك فيها.. ولو إني أشك.

أحمد حلمي يكتب_ماتيجو نقرا الفاتحة

ماتيجو نقرا الفاتحة

شاهدت ماتش مصر والجزائر الذي بدأ بقراءة الفاتحة بين اللعيبة المصريين وانتهي بفوز مصر علي الجزائر أربعة/ صفر.. واعذروني فلن أتحدث عنه.. وشاهدت ماتش مصر وغانا الذي بدأ بقراءة الفاتحة أيضا بين اللعيبة المصريين وانتهي بفوز مصر علي غانا واحد/ صفر، واعذروني لن أتحدث عنه.. لقد شاهدت «ماتش» آخر لم يشاهده أحد غيري.. ماتش لم تُقرأ فيه الفاتحة.. وهو ما سأتحدث عنه.. جميعنا يعرف أنه لكي تكون هناك مباراة حاسمة، فلابد أن يكون هناك فريقان يلعبان.. وعندما تنتهي المباراة، فلابد وأن يكون أحد الفريقين فائزًا، وبالتالي يكون الآخر خاسرًا.. والأقوي هو من يفوز والأضعف هو من يخسر.. وكُلنا نعرف نتيجة الماتشين اللذين لن أتحدث عنهما.. ليس لعدم أهميتهما، بل علي العكس.. فهما حدثان يستحقان أن يدخلا موسوعة «جينس» للأرقام القياسية، ولكنني سأتحدث عن ماتش آخر أشعر بأنه أهم بكثير من ماتش مصر والجزائر ومصر وغانا.. سأتحدث عن ماتش حدث ورأيته بعد المباراتين - مصر والجزائر، ومصر وغانا - ماتش كان بين مصر ومصر.. مصر كانت هي الفريق الأول فيه، وكانت هي أيضا الفريق الآخر.. إحداهما فائزة والأخري خاسرة.. ماتش مصر ومصر الذي أريد الحديث عنه لم يحدث علي أرض الملعب.. لم يحدث فوق المستطيل الأخضر.. بل كانت الشوارع والحارات والكافيهات والمقاهي والبيوت والأسطح والكفور والنجوع والحدائق والمقابر والشبابيك والبلكونات هي أرض الملعب.. وكان المصريون فيه هم اللعيبة.. وكان العالم بقاراته وأقطاره هم المتفرجون.. شاهدت «ماتش» كان بين دولة ونفسها.. نفس الدوله تلاعب نفسها.. مصر بتلاعب مصر.. بلد ضد نفسه.. لاعبوه هم أهله.. ولا وجود للحكم.. فلتكن أنت الحكم.. ياتري هتتمني مين يغلب؟.. هتدعي لمين بالنصر؟.. مصر اللي بتحبها ولا مصر اللي برضه بتحبها.. شاهدت الماتش الذي كانت النتيجة فيه بالتأكيد لصالح مصر.. ولكن أي مصر؟ فازت مصر فيه علي مصر بتمانين مليون جون مصري.. هناك تمانين مليون لاعب مصري أحرزوا أهدافهم التمانين مليون في أنفسهم.. حسيت بعد ماتش مصر وغانا إننا مش مصر واحدة.. إحنا مَصْرين.. مصر الفايزة الفرحانة الضاحكة المتلألئة.. ومصر الحزينة الصامتة في الشوارع والحارات المظلمة.. مصر الباكية التي تنظر إلي فرحة المصريين من خلف شيشان الشبابيك والبلكونات المغلقة.. مصر المكسوفة التي انهزمت من مصر المحروسة.. شعب مصر الفائز وشعب مصر الخاسر.. سألت نفسي: ياتري أنا من أنهي مصر فيهم.. الفايزة الفرحانة المحروسة.. ولاّ المغلوبة الحزينة المكسورة.. من أنهي شعب فيهم؟ أنا اللي فزت ولا أنا اللي اتغلبت.. تصدق أنا من الاتنين.. من المَصْرين.. أنا غلبت واتغلبت في نفس الوقت.. عمرك شفت حد يبقي غالب ومغلوب في نفس الماتش.. عمرك سمعت عن ظالم ومظلوم في نفس القضية.. فرحت وصرخت وهيصت ورقصت وسجدت مع مصر اللي فرحت.. شفت الشوارع المليانة بالمصريين الفرحانين بالفوز والنصر العظيم.. شفت سعادة مشفتهاش قبل كده.. شفت شعب بيموت في تراب مصر.. بيعبد مصر.. بيعشق مصر.. بيرفع علم مصر.. حناجر مصرية مبحوحة من قوة وعلو واستمرار الهتاف بحب مصر.. لا أعتقد إن فيه شعب في العالم كله بيحب بلده زي المصريين.. وإلا مكانش قال «مصر هي أمي».. لم يكن في الشارع مكان لقدم.. ولا لإيد.. لو راسك هرشتك مش هتلاقي مكان فاضي ترفع إيدك علشان تهرش.. إيه الزحمة اللي في الشوارع دي؟ إيه الحب ده؟ إيه الدموع والقشعريرة دي؟.. إيه اللي بتعمله كلمة مصر فينا ده؟ الله عليكو يا مصريين وعلي حلاوتكو.. حلاوتكو اللي بيزود حلاوتها مرار صبركو فبقت حلاوة حلوة بزيادة.. وزي ما شفت شوارعها مليانة شفتها برضه قبل ما تتملي.. ومش عارف ليه تخيلتها بعد ما فضيت.. بعد المولد ما انفض.. عارفين شفت إيه في شوارعها وفي وشوش ناسها؟ شفت مصر التانية.. مصر اللي اتهزمت من مصر الأولانية.. مصر اللي كانت مستخبية ورا الشبابيك.. مصر الفايزة مشيت ومصر المهزومة فضلت.. مصر اللي كل واحد فيها في حاله ومالوش دعوة باللي بيحصل، ولا كأننا كنا واقفين جنب بعض من يومين تلاتة في نفس الشارع وعلي نفس الرصيف.. أنا ماسك طرف علم وهو الطرف التاني.. أنا باقول «مصر مصر»، وهو بيرد «تحيا مصر».. شفت واحد بيزعقلي علشان يا دوب ساند علي عربيته.. مع إنه كان من يومين تلاتة ماسك إيدي علشان ما اقعش من علي سقف نفس عربيته.. شفت مصر اللي سحابتها سودة.. شفت مصر اللي بتسأل مصريينها ألف سؤال: إنتو ليه منزلتوش تهيصوا في الشوارع لما نجيب محفوظ وزويل خدوا جايزة نوبل.. ليه ماتظاهرتوش لما نجيب محفوظ اتعرض لمحاولة قتل.. ليه مشفتكوش علي الطريق وتمثال رمسيس بيتحرك في شوارع القاهرة في موكب شهده العالم كله.. ليه ماتظاهرتوش لما اضطهدوا فاروق حسني في اليونسكو؟!.. مصر بتسأل مصريينها: ليه منزلتوش الشوارع تفرحو إن عندنا أذكي طفل في العالم؟.. قاعدين في بيتكو ليه وانتو عندكو كل يوم ميت فرح تملوا بيه الشوارع فرحة.. وكل ساعة مية مصيبة تعترضوا عليها.. إنتو فين؟ ده إنتو صوتي اللي باصرخ بيه وضحكتي اللي بعبر بيها عن حضارتي.. إنتو المنصة والمنبر اللي بتكلم منه.. إنتو سكاني وأهلي اللي من غيركو أبقي مهجورة.. إنتو ليه سايبني وعايشين لنفسكو؟ ده أنا إنتو وإنتو أنا.. إنتو فين يا مصريين؟ فين فرحتكو وحزنكو في باقي الحاجات؟!.. ده لو نفس عدد المشجعين اللي في الشارع راحوا الانتخابات الرئاسية هيختاروا اللي هما عايزينه، وحابين يبقي رئيسهم وزعيمهم.. مصر المهزومة بسؤالها عنكم بتقولكم إن خيبتها تقيلة.. مصر الجوانية المستخبية.. بتقولكم: أنا اتغلبت منكم.. مع إني فزت بيكم.. إزاي أبقي غالبة ومغلوبة في نفس الوقت.. إنتو حيرتوني.. اللي هزمها ونجحها نفس ناسها.. ناسها اللي جابوا كل الأجوان ومجابوش ولا جون.. إنتو خلتوني مَصْرين مش مصر واحدة.. ده أنا بقالي سبع تلاف سنة أم واحدة مش أمين.. أنا مصر اللي بتعيط لأن مصر الفايزة بتغيظني وبتطلعلي لسانها.. أنا مصر اللي استخبت من الخجل والكسوف لأنها خسرت في ماتش خلتوني ألعب فيه مع نفسي.. أنا مصر الأم اللي مرضتش أعكنن عليكو فرحتكو وأسمعكو صوت هزيمتي.. إنتو ليه فرقتوا بيني وبيني.. ليه بتفرحوا لمصر ومصر التانية لأ؟!.. إنتو ليه عايشين مَصْرين مش مصر واحدة؟.. ليه مع إني بلد واحد؟.. ليه بنتغلب من نفسنا؟.. ليه لما إحنا بنعرف نغلب بنغلب نفسنا!.. ليه بنفوز علينا في حاجات وحاجات تانية لأ؟!.. ده إحنا نفس الناس.. نفس المصريين ونفس المصر.

صدقوني أنا زيي زيكو.. كل واحد فيكو جواه اتنين.. كل ما قربوا من بعض كل ما بقيو أقوي.. ليه خلتوني مصر الغالبة ومصر المغلوبة؟.. ما تمزجوا المَصْرين.. خلوني مصر واحدة.. مصر الكسبانة.. ماتيجوا منلاعبش نفسنا تاني.. نبقي مصري واحد بمصر واحدة .. بلد مش اتنين.. ماتيجو ناخد بالنا إن الطرف الخسران في ماتش مصريتنا برضه مصر.. ماتيجوا نفّرح مصر الحزينة ونضمها لمصر الفرحانة.. ماتيجو نفرحها معانا.. ما تيجو نبقي كلنا الحضري وأحمد حسن وناخد جايزة أحسن مصريين.. ماتيجو نبقي متعب وزيدان ومحمدي والشافعي وجدو.. ماتيجوا كلنا نبقي حسن شحاتة.. دول حداشر واحد بس فرحوا تمانين مليون.. تخيلوا بقي لو كانوا التمانين مليون زي الحداشر دول، هايفرحوا كام مليون لسه هايتولدوا؟ ماتيجو نفّرح المستقبل بولاده.. ماتيجو نخطط حلو ونلعب أحلي.. ماتيجو نفرح بفوز مصر واحدة.. نفرح بكل حاجة.. نفرح بوقفتنا مع بعض وجنب بعض وفي ضهر بعض.. ماتيجو مانخافش ونشوط في الجون.. نباصي ونرفع ونناول بعض.. المزنوق يباصي للفاضي.. ماتيجو ندافع حتي لو هنموت.. ماتيجو نقلل من الأوفسايد والتسلل.. ماتيجو نكسب من غير وقت ضايع ولا ضربات جزاء.. ماتيجو نبدأ الماتش.. ماتيجو نقرا الفاتحة ...

 

أحمد حلمي يكتب : جــواب

أحمد حلمي يكتب : جــواب

صادف وجودي في إسبانيا احتفالات الفلانتين.. اكتشفت أن إحنا في مصر بنحتفل بعيد الحب ده أكتر من الأوروبيين بكتير.. اللي ماشفت وردة حمرة في إيد واحد أو واحدة.. واضح إن الحب عند الناس دي في القلب

أمي الحبيبة.. تحية طيبة وبعد.. أرسل لك خطابي هذا من خارج حدودك الدافئة.. أرسل لك خطابي هذا من إسبانيا.. من برشلونة تحديدا.. ودي أول مرة في حياتي آجي هنا.. وأحب أطمنك إني كويس، وصحتي كويسة، وكل حاجة حلوة حواليا.. ماعدا الظروف اللي باكتب لك فيها الجواب ده.. الجو هنا برد جدا جدا.. وأنا قاعد دلوقتي علي إحدي القهاوي الإسبانية البرشلونية.. قصدي الكافيهات الإسبانية.. أصلهم هنا ماعندهمش قهاوي، وتقريبا أنا المجنون الوحيد اللي قاعد برة الكافيه مش جوه.. ومكلفت نفسي ولابس تلتميت حاجة.. أهمهم طبعا الكلسون الصوف المصري الصعيدي الأصيل، اللي بيحمي من برد بلاد بره.. ده غير الفانلة الحملات وغير الحملات، والبلوفر والجاكت والكوفية والشراب الصوف التقيل اللي مخلي الجزمة ضيقة علي رجلي.. بس أعمل إيه.. لو ماعملتش كده، هانشف من البرد، وطبعا لا غني عن الجوانتي اللي اضطريت للأسف أقلعه علشان أعرف أكتب علي اللاب توب.. وكل ما أكتب كلمتين تلاتة ألبسه شوية علشان أرجع أدفي إيدي قبل ما صوابعي تقع من البرد، وأرجع أقلعه تاني عشان أكمل كتابة.. لحد ما هايجيلي انفصام في الشخصية.. ده غير صراعي مع بطارية اللاب توب اللي فاضلها نص ساعة وتخلص.. أصلي نسيت أشحنها قبل ما أنزل من الفندق.. عشان كده مضطر أفكر بسرعة في اللي هاكتبه.. لأن المفروض أبعت الجواب ده بالكتير دلوقتي حالا عن طريق الإنترنت من خلال الإيميل.. ولو سألتني: ليه ما احترمتش نفسي وحميتها من البرد الرهيب ده، وقعدت أكتب في الفندق، هاتكون إجابتي: مش عارف.. أنا قلت أجرب وأنزل اكتب في الشارع.. صحيح جنبي دفاية.. بس الحقيقة بتدفي نفسها.. مش عاملة أي حاجة خالص.. جايز اللي مصبرني علي البرد إني باكتب الجواب ده.. الناس قدامي رايحة جاية.. اللي شايل شنطة، واللي ماسك في إيده عيل، واللي ساحب وراه كلب، وكلهم متكلفتين زيي.. فنجان القهوة بيبرد قبل ما الجرسون يحطه قدامي.

أمي الحبيبة.. أحب أقولك إني شفت حاجات كتير هنا شبه اللي عندنا.. شفت بيوت وعمارات علي الطراز الإسلامي والعربي.. أكلت أكلة عبارة عن طبق كده فيه شوية رز علي جمبري علي سمك علي شوية حاجات مش مفهومه، وكلها معجونة في قلب بعض وجوه بعض.. شكلها يقرف.. بس طعمها حلو قوي.. الأكلة دي اسمها «باييا»، ولما سألت عن سر الاسم، قالولي إنه اسم عربي بمعني «البقية»، والسبب في تسمية الأكلة بالاسم ده، أنه مقصود بيها بواقي الأكل، وبعد ما اطمنت إنه مش بواقي أكل حد تاني من اللي قاعدين جنبي في المطعم، كملت أكل.. ثانية واحدة، هاطلب قهوة تاني بدل اللي بردت.. «مرت خمس دقايق».. معلش اتأخرت، أصل التفاهم كان صعب شوية مع الجرسون.. باحاول أفهمه أنا عايز إيه، وهو مش فاهم، فكان الحل إني أشاورله علي الفنجان اللي برد، وأقوله: واحد تاني.. بلغة الخرس، والحمد لله فهم، وراح يجيب قهوة تانية.. واضح أنه أخرس.. عايز أقولك إنه بالرغم من إن الجو برد جدا، لكن الهوا نضيف ونقي لدرجة إني جالي حساسية من الأكسجين النضيف.. كمان في حاجة مضايقاني شوية لقيتها في الفندق، وأنا باقلب في قنوات التليفزيون إمبارح قبل ما أنام.. مالقيتش ولا قناة عربية.. مش عارف ليه! مع إن قناة الجزيرة القطرية موجودة.. شكيت إن قطر مش دولة عربية، بس اتأكدت لما لقيت المذيع بيتكلم عربي زينا.. مش عارف ليه قنواتنا العربية مش موجودة في إسبانيا.. شفت كمان حاجة غريبة جدا.. عارفة شفت إيه! شفت عجل كتير مركون علي الرصيف.. كله شكل واحد، ومقفول بقفل كده من عند الجادون.. وطبعا سألت: إيه العجل ده وبتاع مين؟ قالولي إن العجل ده بتاع الحكومة.. عاملاه للمواطنين باشتراك سنوي أربعين يورو في السنة.. يعني حوالي تلاته يورو ونص في الشهر.. وفايدة العجل ده إن أي واحد مشترك فيه، يحط الكارت بتاعه والقفل يتفتح، وياخد العجلة يروح بيها مشواره، وبعدين يركنها في أقرب موقف للعجل جنبه.. وطبعا العجل ده في كل شارع من شوارع برشلونة، والمشروع ده الحكومة عملته عشان تقلل من كمية التلوث اللي مش موجود أصلا! الغريب بقي يا أمي إن محدش بيسرق العجل.. ماحدش فكر ياخد عجلة ويأجرها أو يفككها ويبيعها في وكالة البلح بتاعة إسبانيا.. لفت نظري كمان إن الناس كلها بتمشي بسرعة.. حتي اللي بيتمشوا بيمشوا بسرعة.. الناس هنا بتقدر الوقت، وكأنه أهم من الأكل والشرب.. ثانية واحدة عشان القهوجي.. قصدي الجرسون جايب القهوة وجاي.. «مرت خمس دقايق».. معلش اتأخرت.. أصل الجرسون جاب القهوة باللبن، وأنا طلبتها من غير لبن.. وطبعا هاشربها باللبن لأن مستحيل يفهم.. ده فهم إني عايز قهوة بالعافية.. المهم.. صادف وجودي هنا احتفالات الفلانتين.. عيد الحب.. اكتشفت إن إحنا في مصر بنحتفل بعيد الحب ده أكتر من الأوروبيين بكتير.. اللي ماشفت وردة واحدة حمرة في إيد واحد أو واحدة.. واضح إن الحب عند الناس دي في القلب مش في الورد الأحمر والهدوم الحمرة بس. أمي الحبيالحلوة اللي هنا معايا عندك، كنت جبتها.. بس مش هاينفع، عشان دي حاجاتهم مش حاجاتنا.. بتاعتهم مش بتاعتنا.. بس لما أرجع، ممكن أحكيلك عن كل اللي شفته، وأفرجك كل الصور اللي صورتها.. هافرجك صور الشوارع والبيوت النضيفة.. هاصورلك صورة للسما والسحاب عشان تشوفي الجو هنا عامل إزاي.. هاصورلك ضحكة الجرسون اللي طلعت عينه، ومش متضايق مني.. هاصورلك ناس بة.. باركيلي أنا ماشي علي الرصيف.. أنا مش شايف زبالة.. أنا باعدي الشارع من علي خطوط المشاة.. أنا بردان.. بس مش مهم.. أمي الحبيبة أنا مش فاهم الناس، ولا الناس فاهمني بس مبسوط.. أمي الحبيبة كان نفسي تكوني معايا عشان تشوفي وتتفرجي بنفسك.. لو كان ينفع أجيب الحاجات جايز يكونوا مش مؤمنين خالص.. بس مؤمنين جدا.. هاصورلك نفسي.. ومتستغربيش لو لقيتي شكلي مختلف عنهم.. لأني هابقي متضايق ومتحسر ومغلول.. لأني هابقي أناني وباقول إشمعني هما.. أمي الحبيبة.. وحشتيني بالرغم من إني مابقليش أسبوع هنا.. أمي الحبيبة.. بحبك أكتر من أمريكا وإسبانيا وفرنسا وانجلترا والصين واليابان وكل بلاد الدنيا.. أمي الحبيبة.. نفسي أسألك سؤال حتي لو معندكيش جواب.. بس هاسأله.. هو ليه الحلو مبيكملش يا أمي.. هو ليه إحنا عندنا بنلاقي العضم في الكرشة.. الناس هنا عاديين زينا.. عندهم إيدين ورجلين وعنين ومناخير ومخ، وبياكلوا وبيشربوا زينا، وبالرغم من كده.. حاسس إنهم مختلفين عننا.. أمي الحبيبة.. البطارية خلاص خلصت.

مقالة احمد حلمى اول سنة 2010

مقالة احمد حلمى اول سنة 2010 بعنوان 1/1/1

من التاريخ ده 1/1/1 للتاريخ ده 2010/1/1 عدي ألفين وعشرة سنة.. بعدد الألفين وعشرة سنة.. كل سنة وإنتوا طيبين.. السنة بتيجي وبتعدي بحلوها ومرها.. بنعيشها وبتعيشنا بوحشها وكويسها.. وحال السنين زي البني آدمين.. زي ما فيها الكويس والوحش والحلو والمر.. في من الناس برضه زيها.. مع بداية السنة الجديدة قررت أكون أنا كمان جديد زيها.. بس هاخد منها حلوها وأبعد عن مرها.. أعيش كويسها وأبعد عن وحشها.. مع السنة الجديدة قررت أكون حلو وكويس.. في السنة الجديدة قررت أكون مثالي في كل حاجة.. في تصرفاتي في ردودي في أخلاقي.. أكون الشخص المثالي.. صحيت وغسلت سناني وفطرت وحلقت دقني ولمعت جزمتي.. وعشان أبقي مثالي علي الآخر لبست قميص أبيض مكوي جدا.. هانزل بقي الشارع أعيش في دور المثالي.. فتحت باب شقتي وضغطت علي زرار الأسانسير علشان يطلع، وفضلت مستني.. إن الأسانسير يطلع.. مابيطلعش.. خمس دقايق.. عشر دقايق.. مش راضي يطلع.. فقررت ماعملش عقلي بعقل الأسانسير، ونزلت له أنا.. في الدور الأرضي لقيت بابه مفتوح، وإيد حريمي طالعة منه، وواحد واقف وماسكه بإيده.. كان مرتضي.. جارنا في العمارة.. بس الإيد الحريمي ماعرفهاش.. قربت من الأسانسير وعرفتها بعد ماشفت وشها.. انشراح.. مرات مرتضي.. واقفين يرغوا مع بعض قدام الأسانسير، وكأنهم معندهمش شقة.. وطبعا كان ممكن يكون ليا رد فعل مش مثالي.. بس لأني النهارده مثالي، فقلت لهم بكل ود واحترام وجيرة: صباح الخير يا جماعة.. أنا واقف بقالي عشر دقايق مستني الأسانسير.. قامت انشراح قايلالي: طب ما إنت نزلت علي السلم أهه.. ابتسمت ابتسامة بتحمل معني «آه يا ولية يا بنت الـ..».. إثبت إنت مثالي.. ثبت فعلا، ورحت مديهم ضهري وماشي.. خرجت من باب العمارة متجها إلي الجراج، وكان فيه كوم زبالة علي ناصية الشارع.. أصل فيه حد سرق صندوق الزبالة من ييجي حوالي خمسة وعشرين سنة.. اضطريت أفادي كوم الزبالة.. وأنا بافاديه بنصي التحتاني، رشقت في فرع شجرة مشوك بالنص الفوقاني.. فدخلت شوكة في كتفي الشمال، ونزل دم بّقع القميص.. طب أطلع أغير؟ مش عايز أقابل مرتضي وانشراح تاني.. لأنهم أكيد لسه بيرغوا عند الأسانسير.. أصل الأسانسير عندنا بيجيب طراوة.. وبعدين أغير ليه؟ ما هو أنا مش رايح حتة أساسا.. كملت طريقي ودخلت الجراج لقيت عربيتي محشورة بين عربيتين «فور ويل» عاليين.. وعرابيتي واطية.. شكيت إن العربيتين العاليين بيعملوا حاجة في عربيتي.. أمال إيه اللي زانقها كده وسطهم.. ماهي واطية وانا عارفها.. بس اكتشفت إني ظلمتها لأنها ماتحركتش من مكانها من ساعة ما ركنتها.. العربيتين العاليين دول هما اللي ركنوا جنبها.. وسايس الجراج هو اللي سامح بالمسخرة دي في الجراج.. حاولت أدخل من بين العربيتين عشان أدخل عربيتي.. ماعرفتش.. أصل السايس لازق العربيتين في عربيتي.. كل عربية لازقة في باب.. طب أنا أدخل إزاي.. استغليت رُفعي وحاولت أدخل من الناحية اليمين، وفعلا وصلت للباب، بعد ما مسحت جنب عربيتي والعربية اللي جنبي بقميصي الأبيض، وبقي رمادي.. بس الحمد لله الكمام كانت لسه بيضة، لأني كنت رافع إيدي لفوق، فبقي قميصي أبيض في رمادي.. وفشلت محاولاتي للدخول من باب السواق.. قلت أجرب الباب التاني جايز الحتة تكون أوسع شوية.. دخلت بين عربيتي والعربية التانية.. وصلت للباب بعد ما مسحت الجنب التاني لعربيتي والعربية التانية بقميصي الرمادي اللي بقي إسود.. بس الحمد لله الكمام لسه بيضة.. وأنا لسه مثالي.. ولازم أبقي مثالي.. وصلت وبقي صدري قدام باب عربيتي، وضهري في باب العربية اللي جنبي وإيدي مرفوعة لفوق.. ولو حد بص من أي بلكونة هايفتكر حاجتين مالهومش تالت.. يا إما أنا بعمل حاجة عيب في عربيتي.. أو العربية اللي ورايا بتعمل حاجة فيا! وتخيلوا بقي علي آخر الزمن ابقي بتاع عربيات.. إيدي مرفوعة لفوق، وأنا مزنوق وسط العربيتين، ومش عارف حتي أنزل إيدي أطلع المفتاح.. خرجت زي ما دخلت.. بس الحمد لله لسه كمام القميص بيضة والقميص بقي إسود غامق.. قعدت ألف وأدور حاولين نفسي.. أعمل إيه بس يا ربي.. أصرخ بعلو صوتي في الجراج.. جاتلي فكرة إني أدخل العربية من فتحة السقف.. أكيد اللي اخترع فتحة السقف دي شاف يوم زي اللي أنا شفته ده.. ولأن فتحة السقف ممكن تتفتح من المفتاح.. رحت فاتح فتحة السقف ورحت طالع فوق السقف ورحت مدلدل رجلي ونزلت بجسمي وإيدي مرفوعة لفوق وكأني نازل في بير.. والحمد لله وأنا نازل.. كمام القميص حكت في فتحة السقف.. وأنا عمري ما فتحت فتحة السقف لأني باخاف من الناس اللي بتف من البلكونات.. ما هو أنا مش عاملها متففة.. فكل جوانبها معبية تراب.. فكمام القميص حكت فيها وأنا نازل فبقت سودة.. كده يبقي فاضل وشي.. نفسي أعرف مين الناس اللي ركنت كده لزق في عربيتي.. مفيش مخ.. وأخيرا ظهر السايس، وعايز يلمع العربية.. لكن بعد إيه؟! المفروض يلمعني أنا.. المهم خرجت بالعربية لقيت السايس بيقولي: كل سنة وإنت طيب يا بيه.. أنا طبعا عارف هو عايز إيه.. وبسبب اللي عمله فيا ده.. استهبلت.. بالرغم من إن الاستهبال مش من المثالية.. ولا كأني استهبلت.. وقالي برضه: «كل سنة وإنت طيب يا بيه».. فرحت مكمل استهبال زيه وسايبه وماشي.. وطبعا بصيت في المراية لقيت شفايفه بتتحرك، ولما لاقاني باصص له راح راسم ابتسامة علي وشه.. ودي كانت أول مرة في حياتي أشوف واحد بيعمل حاجتين عكس بعض في نفس الوقت.. بيلعن سلسفين جدودي وهو بيضحكلي.. حقيقي رائع وحقير.. علي فكرة أنا باديله مرتب شهري.. بس كل سنة وإنت طيب دي تقريبا حوافز.. المهم خرجت من الجراج وطلعت علي أول شارعنا العمومي.. لقيت ناس عايزة تعدي الشارع، فوقفت لهم عشان يعدوا.. وكأنهم يا عيني أول مرة حد يقف لهم.. فكان كل اللي يعدي من قدامي يبص عليا وهو مبتسم بعدم فهم، ويقول: إلحق واحد راكب عربية وبيقف للناس عشان يعدوا.. رد عليه اللي جنبه وقاله: ده تلاقيه لسه جاي من بره أو لسه متعلم السواقة جديد أو أهبل.. التاني قاله: طب الراجل واقف مش هانعدي ولا إيه.. رد عليه وقاله: إستني لما يتحرك وبعدين نعدي من قدامه.. أنا ما أعرفش أعدي من قدام العربيات وهي واقفة.. ناقص تقولي أعدي من علي خطوط المشاة! المهم وأنا واقف عدي من جانبي شاب ماسك رزمة ورق صغير وراح رامي ورقة في شباكي.. جت في عيني طرفتها، وقولتله: الله يسامحك.. وطبعا ماسمعنيش لأنه كان بيطرف عين اللي ورايا، ولسه هابص علي عيني في المرايا، وابتدي صوت الكلاكسات اللي ورايا يعلي أكتر وأكتر.. ده غير الشتايم.. ما تطلع يا بني آدم.. ما تتحرك يا حمار.. واللي يعدي من جنبك ويروح تافف عليك، ويقولك يلعن أبو اللي ركبها لك.. رحت طالع وراح أخينا معدي وأنا باتحرك.. لقيت الشارع واقف بسبب واحد داخل في الممنوع من أول الشارع وبيعاند مع واحد جاي في الصح.. الغريب بقي إن اللي جاي في الممنوع هو اللي بيشوح للي جاي في الصح.. وقعدنا كده ربع ساعة، والمشكلة ماتحلتش وأنا واقف لا عارف أرجع الجراج ولا أخرج من الشارع.. أنا ليه بيحصلي كده؟! ده أنا عايز أبقي مثالي.. ده جزاتي يعني؟!

نزلت علي السلم وقميصي إسود، وإتف عليا، وسمعت شتيمتي بودني، واتطرفت عيني.. كل ده ليه؟! عشان أنا مثالي.. أمال لو كنت مثالي جدا.. كان حصلي إيه؟! رحت طافي العربية وراجع علي البيت، وعديت من فوق كوم الزبالة، وعورت كتفي التاني لأني كنت بافادي الزبالة اللي اتسرق صندوقها، ولقيت مرتضي وانشراح لسه واقفين.. رحت طالع علي السلم ودخلت شقتي زي ما خرجت.. خرجت بقميص أبيض ورجعت بيه إسود.. اكتشفت إن دور المثالي ده دور صعب قوي.. عمري ما هاعرف أمثله حتي لحد آخر شارعنا.. مش لحد آخر السنة.. كل ألفين وعشرة سنة وإنتو طيبين.