أيوة بغير أيوة بغير
لا انا نقصان ولا ضعفان ولا مسطول ولا سكران
ولازايغ من عيني الضي
ولا حد احسن مني في شي
بس بغير
واللي قالولك غيرة الراجل قلة ثقة او قلة فهم
حمير
غيرة الراجل نار في مراجل
نار بتنور مبتحرقش
واحنا صعايدة منستحملش
شمسنا حامية وعرقنا حامي وطبعنا حامي
واللي تخلي صعيدي يحبها يبقى يا غلبها
أصلنا ناس على كد الطيبة كلنا هيبة
النسوان في بلادنا جواهر
طب لو عندك حتة ماس
هتخليها مداس للناس
ولا حتقفلي اوضة عليها ب 100 ترباس
يمكن حتى تأجري ليها جوزين حراس
يبقى انا لا انا غافل ولا جاهل
كل الفرق ما بيني وبينك اني صعيدي
ينعل ابو دا اليوم اللي اكحل اللي لا ليه اخر ولا أول
اني طلعت لقيتني صعيدي
لو كان بايدي كنت اعملك هندي بريش
واقلب شعري كنيش كلابيش
والبسلك سلسلة مدلدلة خرزة وقلب
بس ازاي البسلك سلسلة هوا انا كلب
ثم العبرة ماهيش في اللبس
اصل المشكلة مش في اللبس
المشكلة عَندك عِندِك
قولت هسيبها وبكرة تحس..... بعده تحس..... بعده تحس
دانا لو جبس كنت زعقت
ماشي صداقة وماشي زمالة
بس مجتش على الرجالة
ماهي نسوان الدنيا كتير
وانا مبقولش تخاصمي الناس
ولا تتحجبي عن الرجالة
ولا تعتكفي وتسكني دير
بس يريت حبة تقدير
إني بحبك وإني بريدك وإني زرعت حياتي في ايدك
وإني غزلت بنات الدنيا عقود على جيدك
وإني تعبت من التفكير
وإني بغير
......................................................
قصيدة للشاعر المصري هشام الجخ
ليست هناك تعليقات:
إرسال تعليق